Inkalpawhna kawngpui chhiatzia kan hre chamchi a, hmun tam takah kawng chhiat avangin nunna hial chan phah an awm bawk. Sorkar chuan fur ruahtui tlak chhuan lamin kawngpui siam that a har thu a sawi dum dum a, zin veivakte erawh an tawp ngawt thei si lo, kan inphun lungawi zel chu a ni ber e.
Hetih lai hian favang khua a thaw tan a, ruahtui a tla lo tan a, sorkar tan chuan kawngpui siam a hun chho ta hle. Mizoram hmun hrang hranga kawngpui chhe zual leh hlauhawm tak tak, nitin zawh loh theih loh ni site pawh an hre vek tawhin a rinawm a, hmalak ran a va ngai ta em.
Kan ram kawngpuite hi tha thei reng a ni a, mipuite pawhin kan theihtawp chuan kan dimdawi chho ve tan ta viau. Mahse, sorkar lam atanga enkawl zui loh lutuk a ni ta fo hi a manganthlak a, a chhe lai siamthat zung zungna a awm miau loh chuan chhiat lam pan zel tur chu a ni si. Sorkar hi a chet ve thuai thuai chu a va ngai em.
Tunah hian kawngpui siam hun a thleng chho tanin a ngaih theih tawh a, ruahtui a tla tawh lo tan a, kan inkal pawhna kawngpuite hi that lam pan turin siam zung zung ni thei se la, sorkar hian pawisa a nei tak zet a nih chuan rang zawka a thawh thuai thuai a tul hle.
Kawngpui chhia avangin nunna tam tak lakin a lo awm tawh a, lirthei tam tak a lo chetsual phah tawh bawk. Sorkar in a mawh a ni tih a inpawm duh lo a, insawipialna ringawt a zawng reng thung. Tunah hian kawngpui siam hun tha lutuk a rawn thleng chho ta a, pawisa a awm tak zet a, kawngpui siam hi an vei tak zet a nih chuan sorkar a chet chhuah a hun ta e.