Mizo volleyball player zinga mite hriat rawn hlawh bera chhal ngam, Vanlaltanchhana (Valbuanga) chu TNT Volleyball Club tan a inlan leh dawn ta.
Karleh Thawhtanni atanga Electric Veng YMA Indoor Stadium, Aizawla khelh tur, Mizoram Volleyball Association (MVA) Season Opening Tournament 2026-ah police rawngrut zo hlim, Kawnpui tlangval hian TNT jersey hain ball a beng leh tawh dawn a, nasa takin an practice mek.
Mizoram volleyball inelna sang ber, Pro Volleyball League-a Mizo player tha bera vawi thum thlan tawh, Valbuanga hian contract la nei mah se hna thar a neih avangin season liam taah TNT tan a inlan thei lo va, tunah erawh rawngrut zo tawhin hna an zawm tawh a, dan pangngaiin a inkhel leh thei tawh dawn a, amah siam liantute kalsan lovin an tlakchham phuhrutu nih ngei tumin a inbuatsaih mek.
Pro Division club-ten inelna tur tournament-ah hi state pawn player tel lova khelh tur a ni a. TNT pawhin an inngahna ni thin, 2023-a Pro Volleyball League-a champion-puitu, Valbuanga ho hian kar kal ta Ningani atangin an center, Muanna Vengah camp-in ngawrh takin an an inbuatsaih.
TNT hian coach thar, VL Sangluaia Sailo kaihhruaina hnuaiah an chak lohna thin siam that tumin setter pahnih, F.Lalhmingmawia leh Lalramnghakdika te an la thar bawk.