Aizawl: Dr. Mayank Poddar, Senior Consultant, Orthopedics and Joint Replacement, Max Smart Super Speciality Hospital, Saket chuan, khup natna chu harsatna tlanglawn tak ni mah se, Osteoarthritis a ni vek kher lo, a ti.
“Thalaite zingah khup a nat avanga osteoarthritis a nih hlau an tam thin a, mahse, a ni kher lo. Khupah hian ruh te, cartilage te, menisci leh ligament te a awm a, chung chuan kan taksa kan chettirna kawngah leh kan rit phurhna kawngah min pui a. Chung zinga a eng emaw ber a chhiat chuan na a siam thei a ni,” Dr. Mayank chuan a ti.
Osteoarthritis-ah chuan khup ruh hmawr tuamtu cartilage chu zawi zawiin a ral a. Hei hian na te, vung te, khup khawng te leh khup tih chet harsatna te a thlen thei. A lan chhuah dan tlanglawn te chu, kea kal lai emaw, step-a lawn lai emaw a nat te, rei deuh thut emaw chawlh hahdam hnua khup khawng tlat te a ni. Kum upa, taksa rit, khup hliam tan he natna vei theihna chance a ti sang thei.
Dr. Mayank chuan, khup natna nei damdawi ina kalte chu doctor-in a lo endik hnuah ding chunga X-ray lak te a chawh thei a, damlo zawng zawng tan MRI tih kher a ngai lo a, enkawlna chu, a nat chhan leh a nat dan azirin a innghat a ni, a ti bawk.
A tir lamah khup na hi physiotherapy, tihrawl tih chakna exercise te, rihna tlakhniamtir leh a tul anga damdawi ei te hmangin a enkawl theih a. Ni tin nun a tihbuai a, ruh chuktuah natna a nasat tawh chuan zai a ngai thei.
Khup na ringawt hi khup thlak ngai tihna a ni lo tih hriat a pawimawh. Hma taka natna hriat chhuah te, enkawlna dik te leh exercise lak ngun te hian a pui thei. Orthopaedic specialist rawn hi, khup nat chhan hriat chhuah vat nan leh a nihna tur ang taka enkawl zui theihnan a pawimawh a ni.