Tun hmaa sorkar department hrang hrangin anmahni puala ram an neih thinte a zim tial tial avangin ZPM sorkar chuan department-te anmahni puala ram pek chu a him tawk lo tiin sorkar ram zawng zawng chu General Administration Department (GAD) enkawl turin a dah ta vek tih Chief Minister Lalduhoma chuan a sawi.
Thawhtannia Ainawn Venga Mizo Students’ Union (MSU) pisa sakna tur lung a phumna inkhawmah Chief Minister chuan, tun hmain department hrang hrangin anmahni puala ram an neih an lo hlep thla ru zeuh zeuh thin a; chuvangin, sorkar ram chu a zim tial tial a. ZPM kaihhruai sorkar chuan department-te anmahni puala ram pek chu a him tawk lo tiin, Revenue hnuaia Revenue Land chu Revenue Depratment-in a enkawl a, a bak zawng sorkar ram chu GAD-in an enkawl ta vek a ni, a ti a. MINECO-a sorkar ram pawh a tawt lutuk tawh avangin ram pek a thiang tawh lo tiin khapna thupek chhuah a nih thu a sawi.
Lalduhoma chuan hnam tana pawl pawimawh te chu ngelnghet taka an awm a duh thu sawiin, Ainawn Veng hi chief minister Brig. T. Sailo hun laia sorkar hmunhma atana duan tawh, mumal taka kalpui zui tak loh a nih thu a sawi a. Tun sorkar hnuah he hmun hi singsa tha in, hmunhma leh office la nei ve lo MSU te hnenah he ram hi hlanin a pisa sakna tur sum thlengin an ruahmansak thu a sawi a. Sorkar chuan pawl dangte tan pawh MHIP leh MUP pisa te bakah YMA Convention Centre (Thingsulthliah) te a sak sak mek thu a sawi bawk.
MSU President B. Lalkhawngaihzuala pawhin thu sawiin, Revenue Minister leh Chief Minister te hnena an dil hnuah hmunhma leh pisa sakna tur puihna an hmu ta chu lawmawm a tih thu a sawi a, Chief Minister Lalduhoma chu engtikah mah an theihnghilh tawh ngai dawn lo a ni, a ti bawk.