- Rinfela Zadeng
Mizo nun hluia hun nuam ber pawl chu Favang awllen, tun ang hun hi a ni awm e. Chuvangin Mizo nun hluia thil pawimawh tak, sakhua nena inzawm ‘Khuangchawi’ te pawh tun ang hunah an neih thin avangin October thla hi ‘Khuangchawi Thla’ tiin a hming an lo phuah hial reng a ni. Thla êng pawh tun ang hun hi a ên ber zan niin, khua a that chuan Khuangchawi Thla thlahleinga zanah chuan mit lawngin lehkha pawh a chhiar theih hial a nih hi.
- Khuarel hlutna leh mawina
Khawvel changkang tawh tak, Artificial Intelligent mai pawh ni tawh lo, Super Intelligent an tih thuak thuak tawhna khawvela kan chen mek lai pawhin khuarel (nature) hlutna leh mawina hi a la danglam lo a, a hlu tial tial zawk a ni. Khuarel mawina hian thu leh hla tha tak tak a pian tir a, mihring nun hlutna leh awmzia pawh hi a pho chhuak thin. Science tarmit atanga kan thlir pawhin khuarel tel loin mihringte hi kan nung thei lo a, kan chhehvela thing leh mau, nungcha dangte nen hian kan nunna hi a inzawm tlat a ni. Pathian thu atanga kan en pawhin lei lung leh a chhunga awm zawng zawngte enkawl tura Pathianin a ruat leh mawhphurhna a pek chu mihringte hi kan ni tih Genesis -ah kan hmu bawk. Chu kan mawhphurhna chu Kristian kan nihna zawn atang pawha kan hlen chhuah tur leh Pathian thupek kan awihna tur kawng pawimawh tak pakhat a ni.
- Mihring chauh lo chu zirtir an ngai lo
Thil siam zawng zawnga chungnung ber mihring te hi zirtir ngai leh inzir thei, hmasawna changkang zel thei kan nihna tak hi malsawmna leh anchhia a ni kawp a. Thil siam dangte chuan a siamtu Pathian duh dan leh ruat danin awm phung leh nih phung, nun phung nghet tak neiin hman atangin vawiin thlengin rinawm takin an awm a. Keini mihringte erawh chu zirtir ngai kan ni a, kan zir loh emaw kan thiam loh emaw kan hriat loh emaw chuan pawi kan khawih a, sual kan tih phah thin a nih hi. Pathianin mawhphurhna min pek, khuarel leh leilung leh a chhunga thilsam dang awmte enkawlna kawngah pawh kan mawhphurhna kan hlen lo fo a. A tawpah a tuartu chu keini mihringte hi kan ni leh thin. Kan hmasawn zel theihna hian khuarel thil tam tak kan tichhia a, chu chuan kan ni tin mamawh – boruak, tui, sik leh sa nuam tawk adt kan tichhe tel a. Kan chenna khawvel hi chen zelna tlak loah kan chhuah mai ang tih hlauhawm khawpin kan suasam a nih hi. Chuvangin hma sawn zel thei, inzir zel thei ni tura Siamtu min siam dan danglam bikna hi malsawmnaa chantir turin kan ngaihtuahna kan sen uluk fo a tûl hle a ni.
- Sakhaw dangte leh Khuarel
Khuarel chunga kan mawhphurhna hi Sakhaw dangte pawhin an inzirtir ve viau mai a. Islam/Muslim kan tihte pawh hian Quran 6:38 – ah chuan ‘thil nung zawng zawng hi nangni ang tho an ni’ tiin duat tak leh uluk taka enkawla venghim turin a zirtir a. Allah chuan he khawvel hi inbuk tawk taka a siam avangin engmah hi tihchhiat loh tur a ni tiin Quran 55:7-9 ah kan hmu bawk. Hindu chuan thil zawng zawng hi thil bul (element) panga – tui, lei, mei, boruak leh van – atanga lo insiam vek a ni tiin a sawi a. Nungcha leh thil siam dangte chunga nun rawng taka nun te hian mihring nunah nghawng tha lo a nei thei (karma) tiin a zirtir a. Chuvangin khuarel tihchhiat chu mahni intihchhiatna ang hialin a ngai a ni. Buddhism chuan hmangaihna leh lainatna te hi mihringah chauh ni lo, thil nung zawng zawng hnenah lantir turin a zirtir a. Engkim hi innghat tawn vek (pratitayasamutpada) kan nihzia a sawi uar hle bawk. Jain leh Sikh te pawhin leilung leh khuarel hi an zahin an ngai hlu hle a; Dalai Lama pawhin he khawvel hi kan in, kan nu a ni tiin khuarel hlutna leh pawimawhna hi a lo sawi tawh a nih kha.
- Khuarel ngaihhlut – changkanna dik
Hnam changkang leh ram changkang apiangin Khuarel hlutna leh pawimawhna hi an hre chiang zel a, an humhalhin an enkawl thin. Zirna huangah pawh lei lung (environment) enkawl leh duat te hi zirlai pawimawh ber ber an ni a. Pathian thu zirna huangah pawh heti lam hawi zirna hi zirlai pawimawh ber ber niin Kristiante mawhphurhna a nihzia hi uar takin a zirtir a ni. Kan eizawnna leh kan ram lei lung azirin a zawng zawngah chuan kan zawm vek thei hauh lo ang. Mahse kan nawm maka sa pelh te, thangkam te, ramngaw tichereu zawnga khawsak te hi mawlna leh sualna, Pathian thu awih lohna a ni tih erawh chuan kan hriat chian deuh deuh a hun tawh hle. Kan incheina, kan thil neih (gadget) velah chuan hnam dangte ai pawha changkang zawk leh tha zawk pawh kan lo ni tawh thei e. Mahse khuarel hlutna leh tangkaina hre lo, chhungkuaah pawh sawi ngai lo, tu leh fate pawh zirtir ngai lo kan nih chuan kan changkan dan a dik tawk lo hle a ni ang.
Khuangchawi Thla boruak nuam tak kan neih zel theihna tur te, boruak sik lek sa nuam tak kan neih zel theihna tur te, hrisel tha taka kan nun reng theihna tur leh kan tu leh fate tana he khawvel hrisel zawk kan siam zel theihna turin khuarel hi hlutin ngaipawimawh ila. Kan hrisel theihna tura zing taka tho kan taksa kan sawizawi laia khuarel thil hlutna kan hriat si loha kan tihchhiat zel si chuan kan hrisel rei thei dawn chuang lo a. Pathian tanna kan nun zawng zawng hlan huama rawng kan bawl laia leilung enkawl tura mawhphurhna min pekte kan hlen chhuah loha kan suasam leh zawk si chuan sual kawng kan la zawh reng a ni tihte hi hre thar ila. Chuavngin khuarel hlutna leh mawina te hre rengin a venghimtu leh a enkawltu nih i tum tlat ang u.