Aizawl khawpui kawng chepzia kan hria a, lirthei a pung telh telh bawk nen, kan kawngpui leh a chhehvelte lirthei tana kan dah thiam a tul zual leh ta hle.
Lirthei a tam avang hian nitin traffic jam a thlen phah ta fo a, kawng kama lirthei dah ho lah a chhun a zanin an awm reng bawk. Veng chhung leh traffic duty lamten heng ho hi an vai thar leh deuh a tulin a hriat a ni.
Kan lirtheite hi kan lei dawnin a dahna nei veka inziak lut kan ni a, chuvang chuan lirthei kawng kama riah ringawt hi dan phal loh leh dan bawhchhiatna a ni tel bawk. Tin, chhun lama kawng kama kan park ringawt thinte pawh hi tih rem dan zawn a hun ta hle mai.
Kawng kam, a park na tur ni lo a lirthei ke li nei leh ke hnih nei kan dah ringawt hian kawng a tizim zual a, traffic jam a siam fo thin avangin thuneituten enfiah lehzual thei se la, tin, kan dawr kawt a ni emaw, pisa kawt pawh nise kawng hnaih leh lutuka dah thin ho hi chu a tul angin hma la thei se a duhawm hle.
Kan inthlahzalen hian a tuartu chu keimahni bawk kan ni a, CM a ni emaw, Minister/MLA, officer motor pawh nise kawng sir, lirthei tlanna dip leh dal, jam siam zawnga dah reng reng chu a tul angin hma la thuai thuai thei se, mitinte lirthei dah kawngah kan fimkhur phah pawhin a rinawm bawk.