Manipur-ah buaina a punlun zel a. Inrinni khan Kamjong district-a inkahna thlengah mi pathumin hliam an tuar a. Chassad-ah Kuki leh Naga intihbuaina chhuak Tangkhul Naga khua pahnih hal a ni a. A hma lawkin Kuki mipa kum 36 thi leh hliam tuar mi pali an lo awm tawh bawk.
Police chuan Kamjong-a Tangkhul Naga khua beih hi zing lama Kuki thahna phuba lakna niin an ring a. Tangkhul Naga pathumin silaia kahna avangin hliam an tuar.
Police chuan Bungpa Khullen khuaa hliam tuarte hi Kamjong Hospital-ah hruai an ni tih an sawi.
“Inrinni chawhnu dar 2.30 vel khan Kuki helho leh an thawhpui ruihhlo tawlhtute chuan Kamjong-ah silai hmet puakin Tangkhul mite an tihlauvin an tichiai hle,” tiin Naga Village Guard-Eastern Command (NVG-EC) chuan thu an chhuah.
“Kamjong-a chengten mak an tih em em chu Chassa-a awm 11 Assam Rifles (ARs) miten Kuki helte hi puiin Naga civil mite tawrhna tur hi an thlen a. Casspir lirthei pahniha kal hmasa AR-te hian nasa taka silai hmet puakin Kamjong-ah hian stun bomb pawh eng emaw zat an vawm a. Stun bomb hi civil mite chenna fuhin Kamjong leh a chhehvela in tam tak a tichhia a ni,” tiin an sawi.
Hetih lai hian Tangkhul Naga khaw pahnih, Skipe leh Pilong chu Kuki hel nia rinten an hal bawk.
“Khaw pahnih hi Indo-Myanmar ramri bula awm a ni a, police pawh an awm lo va, a hmun pawh an la thleng lo,” tiin police officer-in a sawi.
Khaw halnaah hian thi leh hliam an awm lo niin police chuan an sawi.