Aizawl: Inrinni khan Aijal Club McCabe Hall-ah Art & Culture Director Carol VLMS Dawngliani chuan Boichhingpuii, Chaltlang lehkhabu ziak ‘Mizo La Deh leh Zethlan’ (2nd Edition: Revised & Enlarged) a tlangzarh.
He lehkhabu hi kum 2016-a tihchhuah tawh niin, chhut hnihnaah hian bung 5 leh thlalak 85 dah belh a ni a, a vaiin thlalak 444 a awm a ni.
Lehkhabu buatsaihtu Boichhingpuii chuan pipute atanga Mizo puan leh zethlan dik tak a bo zawh mai a hlauh avanga lehkhabu hi siam a nih thu sawiin, kum li chhung buaipui a nih hnua chhut hnihna hi thangtharte tan leh heti lam tui te tana chona a nih ngei a duh thu a sawi.
Lehkhabu thlirlawkna hun hmangtu Padma Shri C. Chhuanvawra chuan he lehkhabu hi thulakna leh thlalak tlawhchhan nghet tak a neih avangin hnial hneh a har hle a ni, a ti.
Tlangzarhtu Carol VLMS Dawngliani pawhin hmanlai thilte ziaka chhinchhiah a pawimawh thu sawiin, he lehkhabu chhut hmasak hi puan eng emaw zat atana Geographical Indication (GI) dilna kawngah pawh an department-in an hman tangkai thu a sawi bawk.
Padma Shri Prof. Laltluangliana Khiangte kaihhruai he hunah hian lehkhabu ziaktu thu lakna kum 80 leh 90 mi te, puantah thiam te, designer te leh researcher thahnem tak an tel a ni.