Aizawl: Disaster Management & Rehabilitation Minister Prof. Lalnilawma chuan Zirtawpni khan New Delhi-a Mizoram House-ah NBCC (India) Limited Chairman leh Managing Director Dr. K. P. Mahadevaswamy kawmin, Mizorama lei min laka invenna leh chhiatrupna dawl zo ruhrel din leh siam that dan kawnga thawhho dan tur a sawipui.
Minister Prof. Lalnilawma chuan Mizoramah furpui laia lei a min fo thin avangin mihring nunna, kawngpui, hmunhma leh building pawimawh te, chenna hmun leh khawtlang inkalpawhnate a tichhe nasa thin hle tih a sawi a. Lei min hlauhawm laka invenna atan science thiamna hmanga zirchianna kalpui tul a tih thu te, hun lo la kal zel tur atan lirnghing leh chhiatna lo thleng thei thlir lawka hmalak a tul thu te, chhiatna thlen hnua siam thar tum ai chuan inven lawk dan tur ngaihtuah a, inbuatsaihna tha tak kalpui a tul thu a sawi a. Mihring nunna leh infrastructure pawimawh te humhim chu state-in a ngai pawimawh thu a sawi
Minister hian NBCC technical leh engineering lama thiamna hmanga landslide hazard mapping siam te, geology leh geotechnical survey neih te leh lei ngheh zawng zirchiana hmachhawn dan tur ruahmanna siam te a sawipui a. Mizoram tlang ram dinhmun mil turin retaining wall, gabion wall, soil nailing, rock bolting, slope stabilisation leh tuihawk luanna tha zawk siam te pawh a sawipui bawk.
An inkawmnaah hian National Landslide Risk Mitigation Programme (NLRMP) ngaihpawimawh zinga dah niin, leimin hlauhawmna hmun nia lang derthawng zawng zawngte ngaih pawimawh hmasak rih turin an ti a ni.
He hunah hian Disaster Management Department Secretary Sushil Singh, IAS pawh telin Mizoram dinhmun leh inbuatsaihna te a tar lang a, NBCC lam atangin Director (Commercial) Dr. Suman Kumar leh senior officer-te telin thawhho dan tur tha ber te an sawi ho bawk a ni.