Tourism Minister Lalnghinglova Hmar chuan Mizo mipui intlawhpawhna hian local economy a tihpun bakah thlalak thehdarh avangin tourism a than phah thu a sawi.
Zirtawpni zan khan Mualnuam, Champhai-ah Hnahsin Kût 2026 kharna hun a hmanpuina he thu hi sawiin tourism minister chuan, Hnahsin Kût ngaihtuah chhuaktu leh bul tantu Champhai Nature Conservancy (CNC) te thawhrimna leh remhriatna chu fakawm a tih thu a sawi a. Hnahsin Kut hian Champhai leh a chhehvel tan sum leh pai vir vel leh economy tihhmasawn kawngah hlawkna lian tak a thlen thu a sawi.
Mizoram chhunga chengte hian ram chhunga hmun mawi leh pawimawh neihte leh Mizo artist-te an ngaihlu telh telh tih sawiin, Mizo-te an intlawhpawh tam hian, sum vir vel a ti pungin local economy a ti tha a, an zinna thlalakte an thehdarh avangin ram pawna miten ram chhung hmun mawi leh nuamte an hriat phahin, tourism a than nasat phah tih a sawi a. Kum 2026 chung hian Mizorama mihring chhunga cheng zat (population) dawn khualzin an hipluh hmel a, Hnahsin Kut leh Champhai hian hemi kawngah an thawhhlawk hle tih a sawi.
Lalnghinglova Hmar chuan Hnahsin Kût hian social media-ah vawi million 22.5 zet en a hlawh thu sawiin, hei hian a lar zia leh hlutna a lantir chiang hle, a ti a. State pawn atanga lo kal khualzinte chu an thian leh chhungte nen Mizorama lo zin leh ngei tura sawmin, Mizoram mawina te, ram ralmuang a nihna leh mipuiten khualzin an lawmthiamna chungchangte midangte hnena hrilh darh zel turin a chah bawk.
Hnahsin Kut tawp zanah hian Mizo zaithiam lar tak takte hovin concert neih a ni a, mipui kalkhawm pawh an thahnem hle a ni.