Pathiannia silaia kah tawk bollywood lemchan thiam Tiger Shroff dinhmun a tha a, ngaihtuahawm a nih loh thu doctor te chuan sawiin, damdawi inah pawh admit ngaiin a awm lo a, a chenna in lamah Maharashtra Dy. Chief Minister Eknath Shinde chuan a tlawh nghal bawk.
Shinde chuan Tiger-a chenna ina an thlalak dun hi social media-a a account lamah dahchhuakin, hetah hian Tiger hi a awm leh banah tuam a ni a, a dinhmun erawh a tha tih sawiin, misualte chhuichhuah kawngah sorkar chuan chak takin hma a la nghal tih a sawi.
Shinde chuan Mumbai Police Commissioner chu a biak nghal thu leh misualte chhui tur team hrang hrang an din nghal thu a sawi a, Mumbai nun ralmuang lo tak anga lantirtute chu dim an nih loh tur thu leh manchhuah ngei an nih tur thu a sawi bawk.
Pathianni khan Tiger Shroff hi a football match khel zo a haw lam chu a car kah niin, a driver nen hliam an tuar a, an motor pawh kah nual niin, hliam tenau an tuar tih loh chu damdawi ina dah ngaiin an awm lo a, CCTV footage hrang hrang atangin police te chuan hnuchhui hna an thawk nghal a ni.
Social media a viral post atanga a lan danin silai hmetpuaktute hi Lawrence Bishnoi gang te nia sawi an ni a, mahse he pawikhawihna thleng hi finfiahna awm lo niin, thil tisuala puhte pawh hian thuchhuah engmah an siam lo bawk.