Zofate hi hnam peng hrang hrang kan ni a, kan awmna hmun a zirin tawng inang lo, zofa hnam peng tawng hrang hrang nisi kan la hmang nual bawk.
Kan hnam chi peng hrang hrangte hi tobul thuhmun, mahse tlakna leilung lo danglam deuh avanga tawng leh khawsak phung lo danglam ta deuh kan ni.
Tun hnaiah Mizo zirlai pawl lian ber MZP te chuan zirlaibua Mizo hnam peng hrang hrang chanchin telh a nih theih nana hmalak a tul thu hi an lo ngaihtuah chhuak a, education minister hnenah pawh thlenin, a theih anga hmalak tum a nih thu hriat zui a ni ta bawk.
Hei hi a hlawhtling thei a nih chuan a tha dawn hlein a hriat a, mizote kan lungrual tlan theihna tur leh thlahtu thuhmun, thangthar lo chhuak zelte pawhin hnam khat/unau kan nih kan inhriat lehzualna tur ni pawhin a lang a ni.
Kan awmna leh tlakna leilung a lo danglam deuh avangin inhmuhsakhi leh inhmuh mihranna a lo awm dawn lek lek thinin a lang a, chuvang chuan unau vek kan nihzia hi kan inhriat thar lehzual a, hnam khat kan nihzia hi kan inhrilh thar a ngai tawh hle.
MZP te duh dan leh rawtna ang hian zirlaibu lamah pawh zir theih turin dah thuai ni se la, sorkar pawhin chak zawkin hma la thuai thuai teh se.