Mizoram Police-ah harh tharna a thleng mek a, tun hnaia police lak turah pawh a tling leh thiamte chauh lak an ni dawn tih Home Minister K. Sapdanga chuan Nilainia Police Training School (PTS), Thenzawlah Cadre Promotional Training nei mek mi 350-te hmaah a sawi.
Home minister chuanMizoram Police-ah harh tharna a thlen mek thu sawiin, tun hnaia constable 259 lak tharte pawh dik tak leh merit based-a lak an nih thu leh an discipline a that thu a sawi a. Police-te hi mipuite hmuha sorkar lan chianna hmasa ber an nih avangin mipuite rawngbawltu nih tum tlat tur leh Mizoram Police hmel thar dintu ni zel turin trainees-te chu a fuih.
Tun hmaa hna laka politics rawng emaw, duhsakna emawa lo kai a nih pawhin, tun training atang chuan merit hmanga thlan chhuah an ni tawh tih sawiin, sorkarin constable 350 leh home guard volunteers 94 a lak thar leh turah pawh a tling leh thiamte ngei lak a ni leh dawn tih a sawi bawk.
Kum nga kal ta chhungin kum tin police 100 chuang an boral thin nachhan tam ber chu zu leh ruihhlo kaihhnawih a ni tih sawiin home minister chuan trainee-te chu ruihhlo laka fihlim tlat tur leh harsatna neite chu an hotute pan hreh lo turin a chah.
Mizoram Police danglam bikna chu ‘Mizo Tlawmngaihna’ a ni tih sawiin, mipuiin police hmel an hmuha an thlamuan phah theih nan hlim hmel pu chunga dan kengkawh tur leh mangangte lo tanpui thin turin a fuih a. Sorkarin hlawh phu tawka thawk thei lote tana special pension scheme a siam thu a sawi bawk.
He hun hmanna hi PTS Principal Lalthakima’n a kaihhruai a, Megna Yadav, IPS, IGP (Training), J. Lalthafamkima, AIG (Training) te bakah Aizawl leh Serchhip district MJA aiawhte leh Thenzawl khawtlang hruaitute an tel a ni.
PTS Thenzawlah hian chawlhkar 12 chhung awh tur Cadre Promotional Training – JUO (Junior Under Officer) 97, SUO (Senior Under Officer) 89 leh PCC (Platoon Commander Course) 87, an vaiin mi 350-te hian September 1, 2026 atanga tanin November 20, 2026-ah an zo dawn a ni.
Anni bakah hian Excise & Narcotics department atangin constable, driver, SI leh Inspector basic training mek mi 39 an awm bawk a, anni hi thla ruk course niin February, 2027 laihawlah training an zo thung ang.