US-a Tallahassee-a Florida university campus bulah inkahna thlengin mi 11-in hliam an tuar a, mi dang pakhat, tlanchhe lai kah hliam a ni bawk tih thuneituten an sawi.
Inkahna hi Perry Street-a Florida Agricultural & Mechanical University campus bula thleng niin university chuan a sawi a. Police chuan puitling paruk leh tleirawl parukin hliam an tuar niin an sawi.
“An zinga pathum hian hliam na deuh an tuar a, mi dang panga erawh ngaihtuahawm an ni lo,” tiin Tallahassee police chuan thuchhuah an siam.
Police hian inkahna ‘inhnial buaina leh insualna’ atanga chhuak zui niin an hria a, chiang erawh an hre bik lo va, an chhui zui mek tih an sawi.
“A tuartu zingah kumtlinglo an tel hi a pawiin a lungchhiatthlak zual a ni,” tiin police chief Lawrence Revell-a chuan a sawi.
Hliam tuar zinga a naupang ber hi kum 11 mi niin NY Post chanchinbu chuan a tar lang a, mi dangte nihna kimchang erawh police hian an la sawi lo.
Inkahna hi in pakhata party-a inhnial buaina chhuak atanga intan a ni a, mi pahnih thum vel an intibuai a, kut an inthlak zui a, silai hial an chelek ta nia sawi a ni a. Silai a puah hun hi Inrinni zan dar 8:00 (India-a Pathianni zing dar 7:00) hma hret niin chanchinbu hian a tar lang bawk.
Police chuan tharum thawhna thleng hi an chhui zui mek a, mi man an nei leh neih loh pawh an la sawi lo va. Tallahassee Police Department (TPD)-a Violent Crime Branch-in an chhui zui mek.
“Kan zirlai, faculty leh thawktute himna kan ngai pawimawh ber a ni,” tiin Florida A&M chuan X-ah an tar lang.