Bay of Bengal-a low-pressure system awm mek chu depression-ah insiamin a insiam chak zel dawn a, hei vang hian Tamil Nadu leh Puducherry-a lawng chawlhhmun pakuaah cyclone warning signal tihchhuah a ni.
Thlivir inmung mek hian Nilainia Andhra Pradesh vaukam a thlen hmain ‘very severe cyclonic storm’-ah a insiam hman dawn niin India Meteorological Department (IMD) chuan a sawi.
Chennai, Nagapattinam, Cuddalore, Karaikal, Pamban leh Thoothukudi telin lawng chawlhmun pakuaah inralrinna tihchhuah a ni tih news agency ANI chuan a tar lang.
Hetih lai hian Puducherry leh a chhehvelah chuan Inrinni zan atang khan ruah a sur bawk a, heng lai velah hian northeast monsoon a la awm reng a ni.
IMD-in bulletin a tihchhuah thar berah depression hi Bay of Bangal khawchhak laili leh chhimchhak inrina bawkah chhimchhak panin darkar khata km ngaa chakin a kal mek.
Weather department chuan depression hian chhim lam pan zelin deep depression-ah a chang zui ang a, Pathianni zan atangin hmarthlang hawiin a kal tan dawn niin an sawi.
IMD chuan Thawhtanni tukah Bay of Bengal khawchhak laili bawr thlengin cyclonic storm-ah a chang dawn niin an sawi a. Insiam chak zelin Thawhlehni tukah chuan Andgha Pradesh vaukam panin very severe cyclonic storm-ah a chang tawh dawn niin an sawi.
Weather department hian Nilaini tukah Bay of Bengal laili thlang lam, Andhra Pradesh vaukam hrul a thleng dawn a. Andhra Pradesh leh Yanam vaukam vel chu Nilaini chawhnuah Bapatla leh Visakhapatnam inkarah a kaltlang dawn niin an sawi.
Khawmual a kai lai hian cyclone hian darkar khata km 140 thlenga chak thli a keng dawn niin IMD chuan a sawi a ni.
Bay of Bengal-a thlirvir a insiam mek lai hian Inrinni zan atang khan Puducherry-ah chuan ruah a thlen tawh a. Puducherry, Karaikal leh Tamil Nadu-a a bul hnai district-ah chuan ruah a la sur chhunzawm dawn nia sawi lawk a ni.