Aizawl: Congress party leh a thawhpui, INDIA bloc-a party hrang hrangte chuan November 1, 2026 hian New Delhi-a Ramlila Maidan-ah ‘Vote Bachao, Desh Bachao’ tih thupui hmangin mega national rally an buatsaih dawn a, he rally-a tel tur hian mi zawng zawng an sawm.
Mizoram bialtu AICC Observer Pawan Godara chuan Inrinni khan Aizawl Press Club-ah mega national rally an huaihawt tur chungchang hi thuthar thehdarhtute kawmin a sawi fiah a ni.
Pawan Godara chuan vote thlak thei tura qualify mi zawng zawngte’n hlauhna emaw an hming paih bo an nihna awm lovin vote thlak theihna chanvo an nei tur a ni tih a sawi a. Electoral roll siam danah lang tlang tak a awm a ngai a, mipui phunnawinate hunbi neia Election Commission-in hma a lak thin a pawimawh hle tiin a sawi bawk.
AICC campaign ruahman angin, October ni 25 atang khan district level, party chhung inkawm, polling booth level-a voter hming paih bo nia puhna endik leh khua leh veng tinah ‘Vote Bachao, Desh Bachao Chaupals’ buatsaih te tan a ni a. Mizoram Pradesh Congress Committee (MPCC) pawhin he campaign hi thawk tan tawhin, October ni 22, 2026 khan Serchhip-ah rally an lo buatsaih tawh a ni.
Pawan Godara chuan vote thlak theihna chanvo humhalh hi democracy-a mipui telna humhalhna atan a pawimawh tak zet a ni tih sawiin, ‘Vote Bachao, Desh Bachao’ hmanga mipui hriatna tihpun leh electoral roll chungchanga ngaihdan leh lungngaihnate sawi chhuah a nih tur thu a sawi a. Democracy kalpui danah mawhphurhna leh thil dik taka tihna tihchak an tum thu sawiin, November ni 1-a Ramlila Maidan-a rally neih turah mipui tam tak tel turin a sawm nawn bawk.