Aizawl Vana Pa Hall-a ni riat chhung Lehkhabu Pho Runpui Thawh 6-na (LPR-6) neih chu Inrinni tlai khan khar a ni. He hun chhung hian Rs. 16,63,780 man lehkhabu hralh niin LPR buatsaih tawh zawng zawnga inhralh tam ber kum a ni. Kumin hian nikuma an inhralh zat chu Rs. 6,52,047-in an khum a ni.
Mizo Writers’ Association (MWA) buatsaih, October 16 atanga tan he lehkhabu zawrh chhuahna hi ni riat chhung hian tlawhtu an tamin mipuiin an hlut hle a ni. Kumin tih lova an inhralh tam ber kum chu 2023 (LPR-3) kha niin, Rs. 10,22,178 man an hralh a, kumin hian Rs. 6,41,602-in an khum a ni.
Kum 2025 LPR-5-ah khan Rs. 10,11,733 man inhralh a lo ni a, kumin hian an khum hneh hle a. Zirtawpni bik khan Rs. 2,70,050 man hralhin LPR buatsaih tawha ni khata inhralh tam ber tum a ni bawk.
MWA hian kum 2019 khan a vawi khat nan buatsaihin, hripui leng avanga chawlh a nih hnuah kum 2022 atang khan kum tin an chhunzawm leh ta a ni. Kumina organising committee chairman Dr. Lalsangzuala chuan digital khawvela chen tawh hnuah pawh lehkhabu chhiar thin leh chhiar tum tam tak an la awm tih hriat chu a nuam hle tih a sawi.
MWA President R. Lallianzuala chuan nakkum hi an pawl kum 50-na (Golden Jubilee) a nih dawn avangin, hemi denchhen hian LPR hi uar leh liantham zawka buatsaih an tum thu a sawi bawk.