WBC heavyweight champion Tyson Fury chuan round ruknaah a khingpui Dillian Whyte chu ‘upper cut’ chiang tak hmangin a knockout a. A champion kawnghren humhim in professional boxing chawlhsan a tum tawh chu a tum tlang dawn tih a sawi.
Wembley Stadium a mipui 94,000 hmaah British boxer chhuanvawr pahnihte an inhmachhawn a. Tharum piah lama boxer thiam pahnih thluaka an inbeihnaah Fury chu chan tha zawk a ni tluan.
Round rukna a a hnek tluk hnuah Whyte chu tho leh thei mahse a lu a hai tawh em avangin referee in inhnek a titawp.
Fury nge nge
Feet 6 leh inches 9 a sang Fury hi a len avangin a boxing thiamna in fak a phu ang a hlawh lo thin a, mahse Whyte-a lakah tunhnaia heavyweight boxer zingah ‘technical fighter’ tha ber a nihna chiang takin a lang.
Whyte-a kut veilam a hlauhawm tih a hria a, a tirah a dinglam hma theh zawkin khel mahse round hnihnaah veikhawrin a inthlak leh a, a khingpui nen ‘thluak’ game an khel thiam.
Professional bout vawi 33 atang vawi 32 chakin vawi khat draw a nei a, tlawm a nei lo.
A chak hnuah, “Khawvel boxing chanchin a Rocky Marciano tih lova tlawm miah lova chawl thei pahnihna ka ni dawn. Ka tum ka hlen tawh a, hemi tur hian hun rei tak chhung, zinkawng thui tak ka zawh tawh a ni.” a ti a.
“Ka nupui hnenah Wilder ka hneh khan ka duhtawk ang ka ti a, mahse Wembley a inlan tura sawmna ka dawng a, fans te laka ka bat ve nia ka ngaih avangin ka remti.” a ti bawk.
A nupui Paris Fury chuan, “Chawl tawh se ka duh a, engmah hlen chhuah leh tur chuang a nei tawh lo. Unification bout tih loh chu engmah boxing-ah hian Tyson hi ko kir thei a awm tawh lo.” tiin a pasal chungchang a sawi.