Bairabi Bamboo Industry kudam-a Burma kuhva ro man chhuah chungchanga thu kal zelah, Pathianni tlai lam khan Zampuimanga Group YMA chu Vanlalduata, SDPO Kolasib hoin hmalak zel dan tur ngaihtuahin an thukhawm.
Bairabi Police Station-a thutkhawmah hian Bairabi Bamboo Industry kudama Burma kuhva ro ni ngeia rin awm chungchangah, thawh hona tha zawk nena hmalak chhunzawm zel an rel a. Custom lamin foreign product a nihna finfiahna tha tawk tak (concrete evidence) neih a nih loh chuan an man theih loh thu an sawite sawi hoin, a tul anga hmalak zel nise an ti.
April 13, 2022 khan Zampuimanga Group YMA hian Sub Deputy Commissioner, Bairabi hnenah Bamboo Industry kudam a kuhva ro awm chungchangah FIR hi an thehlut a; Sub Deputy Commissioner, Bairabi hian FIR hi Bairabi Police OC hnenah a thlen a, police hian custom-ah hlan an tum ve leh nia thudawn a ni.
Thudawn danin custom lam hian Burma kuhva ngei a ni tih finfiahna a awm loh chuan kuhva ro hi an la duh lo a, a finfiahna an neih mai loh avangin police hian custom kutah an la hlan lo bawk a ni.
The Zozam Times zawhna chhangin Zampuimanga Group YMA President C Lalbiakenga chuan, “Burma atanga lakluh a nihna, foreign product a ni tih finfiahna kan la neih loh avangin, custom lam pawhin case pangngai anga kaltir theih lohna lai a awm a, hei hi kan mutan ber a la ni rih a. Hmalak pawh duh angin a la chak thei lo a ni,” a ti.