TATA company-in Tokyo Olympic-a India aiawhtu Car thar a pek zingah India hmeichhe hockey team ami Mizo nula Lalremsiami a tel a, nimin khan Aizawl-a TATA dealer National Business Enterprises-in Car thar hi Lalremsiami kutah an hlan.
TATA company chuan Tokyo Olympic-a India aiawh Car an pek te hi an awmna state theuha TATA dealer te kaltlangin a hlan theuh a. Lalremsiami pawh hi Aizawla TATA dealer National Business Enterprises atangin Dealer Principal Paul Zothanpuia John chuan nimin khan Car thar Altroz – The Gold Standard chu a hlan a ni.
Lalremsiami kuta Car thar hlan inkhawm tawi ah Transport deptt. Jt. Director Lalrinawma’n Remsiami’n a car thar register tura a buaipui ngai lovin Aizawl atangin a awmna Kolasib district-ah registration chu an lo tihfelsak vek tawh tih a puang a, Remsiami Car registration no. chu MZ 05 A 8030 a ni tih a puang bawk.