India hmarchhak state-ah ruah sur hnai


Indian Meteorological Department (IMD) chuan kar thar tir lamah hian India hmarchhak state pangaah ruah tam tak a sur dawn tih a sawi lawk.
IMD-in a sawi lawk dan chuan hmarchhaka Assam, Meghalaya, Arunachal, Nagaland leh Manipur-ah te Pathianni leh Thawhtanni hian ruah a sur nasa dawn.
IMD DGM Dr Mrutyunjay Mohapatra chuan, “Ruah tam tak hi hmarchhak state-a Assam, Meghalaya, Arunachal Pradesh, Nagaland leh Manipur-ah te December 5 leh 6 hian a sur rin a ni,” tiin Thawhlehni khan a sawi.
“Thailand leh a thenawm hnai, Andaman Sea velah low-pressure a inmung mek a, hei hi khawthlang lam hawiin, hmarthlang lam panin a kal zel ang a, Andaman Sea lailiah darkar 12 lo awm leh tur chhung hian a lut ang a, December 2-ah chuan depression a ni hman ang a, December 3-ah chuan intracycle storm-ah a insiam hman dawn a ni,” tiin Dr Mohapatra chuan a sawi.
“Andaman Sea-ah hian vawiin (Thawhlehni)ah pawh thli hi darkar khata km 40-60 a chakin a tleh a. December 3 hian hmarthlang lam panin a kal zel ang a, Andhra Pradesh hmar lam leh Odisha vaukam hi December 4 tukah a thleng dawn a. Thli pawh darkar khata km 90-110 vela chakin Bay of Bengal khawthlang lam lailiah chuan a tleh tawh ang,” a ti bawk.
Dr Mohapatra chuan, “Sangha mantute pawh December 2 atang chuan tuipuiah chhuak tawh rih lo turin kan rawn a. Andhra Pradesh hmar lam, Odisha, West Bengal leh hmarchhaka lo neitute pawh an thlai chin la ding thate him theihna tur ngaihtuah tura tih an ni a. Thli leh ruah hian a tichhe thei dawn a ni,” a ti.

Leave a Reply

Your email address will not be published. Required fields are marked *

error: Content is protected !!