Mipa kum 32 mi, Maharashtra-a Thane-a cheng, South Africa atanga tun hnaia zin haw chu Covid-19 a kai tih finfiah a ni a, mi thiamte chuan tun hnaia hmuh chhuah thar, Omicron variant a nih ngei an ring hle.
COVID-19 care centre-ah enkawl mek a ni a, a sample hi chiang zawka endik tura tih niin thuneitu pakhat chuan inkai awlsam zawk, Omicron variant a nih theihna a sang hle tih a sawi.
An endikna result hi ni sarih hnuah a hriat dawn tih Kalyan Dombivli Municipal Corporation (KDMC)-a epidemic control officer Dr Pratibha Panpatil-i chuan a sawi.
World Health Organisation (WHO)-in ngaihven ngai variant-a a dah mek, Omicron hi khawi atanga a kai nge tih hriat mai theih a ni lo tih a sawi.
KDMC Commissioner Dr Vijay Suryavanshi chuan Kalyan-Dombivli vela chengte chu chiai mai lo turin a chah a, COVID-19 laka himna tura dan zam awmte chu tha taka zawm mai turin a ti.
Hri kai hi Nilaini kal ta khan Thane district-a Dombivli khuaah hian a thleng a. South Africa, Dubai leh Delhi a tlawh kual tawh a ni.
Dr Panpatil-i chuan hri chi thar a awm avanga sorkarin tih dan tur a zam thar angin endik a ni a, hetah hian coronavirus a kai ngei tih an hmu chhuak tih a sawi.
A chhungte pariat pawh endik vek an ni a; mahse, hri lakah an him vek thung niin thuneitu pakhat chuan a sawi.
An khaw roreltute chuan thlawhna leh a kalna danga a chuanpuite pawh mahni inchika an dinhmun lo inthlithlai theuh turin an hriattir tih Panpatil-i chuan a sawi bawk.
Hri kai hi engineer a ni a, South Africa atanga a lo thlen hnuah a unaupa chu inendikin coronavirus a lo kai lo va; mahse, ani hian a unaupa chu South Africa atanga thleng hlim, coronavirus kai a nih thu sawiin natna lang chhuak a nei lo niin a sawi bawk tih thuneitute chuan an sawi.
“Engineer hi Dombivli-a COVID-19 care centre-ah dah hran a ni a; mahse, a depress hle avangin counsel a ni,” a ti.
Karnataka Health Minister Dr K Sudhakar pawhin South Africa atanga an rama lut, ram dang mi pahnih chuan Delta variant ni lo a chi dang an kai tih a sawi.
Minister hian heng mite hian Omicron hi an kai tih erawh a sawi chiah lo va; mahse, Indian Council of Medical Research nen inbepawpin chiang zawka hriat theih thuai a nih a rinawm tih a sawi.
Heng mite pahnih hi a hma chuan Delta variant ve ve an kai nia sawi a ni.
“Thla kua liam ta chhung khan Delta variant bak a awm lo va, tunah hian sample pakhat chu Omicron a ni a; mahse, hei hi tihchianna (official) a la awm lo va. ICMR leh sorkar laipui nen kan indawr mek,” tiin Sudhakar chuan a sawi niin news agency PTI chuan a sawi.
Damlo mek hi kum 63 mi a ni a, a bak erawh sorkar chuan a puang lo.
Omicron an hmuh chhuah hmasak berna, South Africa atanga Karnataka-a lutte chu uluk leh chik takin an umzui zel tih minister chuan a sawi bawk.