Khawvelin a buaipui leh mek, Covid-19 chi thar hlauhawm tak, Omicron variant vei Mizoramah hmuh a la ni lo.
The Zozam Times zawhna chhangin Covid-19 chungchanga sorkar thupuangtu, Dr Pachuau Lalmalsawma chuan Mizoramah Omicron variant vei hmuh a la nih loh thu sawiin, vei an awm leh awm loh chian nan sample thawn tur khawn khawm mek a nih thu a sawi.
Mizoramah Covid-19 chi thar vei an awm leh awm loh hriat nan hri vei sample-te chu Kalyani, West Bengal-a National Insitute of Biomedical Genome (NIBMG)-ah thawn thin a ni a, tuna sample an lakkhawmte pawh helai hmunah hian thawn a ni dawn.
Dr Pachuau Lalmalsawma chuan he hri tharin khawvelin a hmelhriatna a la rei lo avangin Mizoramah vei an awm pawh a la hun chiah lo tih sawiin, NIBMG-a sample an thawn result an hriat hunah Omicron variant laka Mizoram dinhmun chu hriat chian theih a nih tur thu a sawi.
Khawvel ram thenkhatah Omicron variant vei hi hmuhchhuah ni tawh mah se India ramah erawh Omicron variant vei finfiah an la awm lo a,vei rinhlelh erawh an awm tawh thung a; Mizoram thenawmah vei an la awm lo nia hriat a ni.
Mizoram henawm ram, a hnaivaiah Omicron variant vei hmuhchhuah la awm lo mah se fimkhur erawh a ngai tih sawiin, “Covid-19 hrik thar hi a darh chak tih kan hria a, fimkhur viau a tul,” a ti.
Dr Pachuau Lalmalsawma chuan Omicron variant laka invenna tur inkaihhruaina sorkar laipui lamin an siam zel thu sawiin, Mizoram sorkar pawhin he mi-ah hian ralkhel dar vuain, he hri tharin Mizoram a luh chilh loh nan hmalak nghal a nih thu a sawi.
Tuna mipui himna tur sorkarin SOP a kalpui mek piah lama kal a ngaih tur thute, tun hnaiah Sudan atanga Mizorama rawn lut tur an awm thu leh Mizoram a rawn thlen hunah kar hnih chhung inkhung hrang tura an hriattir tawh thu leh chumi chu a thei lo a nih chuan Mizoram rawn lut rih lo tura hrilh hriat a nih thu a sawi.
Dr Pachuau Lalmalsawma chuan Omicron variant laka fimkhurna atan sorkar laipuiin ruahmanna an siam ang chu foreign atanga India rama rawn lutte thlawhna tumhmunah endik tur an ni a, chutah chuan Omicron variant laka fihlim rih mah se ni riat an inkhung hran hnuah endik an ni a, chutah pawh hri la vei lo mah se mahni inveng fimkhur tura tih a nih thu a sawi bawk.