Dan lova thing zai ruka tawlh a tam chho zel avangin Arunachal Pradesh leh Assam chuan hetiang veng tura thawhho an tum.
Thawhtanni khan Tezpur, Assam-ah Khellong leh Bomdila, Arunachal Pradesh-a forest division-a hotute leh Sonitpur, Assam-a forest lam hotute inbiain hetianga dan pela sumdawnna awm mek titawp tura hma lakho dan tur an sawiho.
Thuchhuah an siamah Assam leh Arunachal ramria forest division huam chhungah a ruka thing zai thin leh tawlh thinte mana hai chhuah an nih theih nan thawhhona tur thuthlung hrang hrang an siam tih tar lan a ni.
“He kan thawhho tum dan hian transit pass lem hmanga thingzai thiar thinte chu kan dang thei dawn a ni,” tiin Khellong Divisional Forest Officer (DFO) VK Jawal chuan an thuchhuahah hian a tar lang.
Arunachal Pradesh lama Bhalukpong leh Bomdila DFO-te chuan inbiaknaah hian transit pass book an neih chu Assam lama Sonitpur leh Udalguri hnenah hlanin hei hian dan lo leh lehkha lem siama thing phur thinte a dang thei ang.
Hetianga hma lak an tum bakah hian awlsam zawka an thu hriat an inhrilh zung zung theih nan WhatsApp group siam ni se an ti a. Ramri hnaih forest division ve vea range officer-te chu dan lova chete veng tur hian a huhovin patrolling thin se an ti bawk.