Sorkarin Krismas leh kumthar vuakveta halpuah leh halmawi lam chi kawl leh hal a khapin zawm hlawh chiah lo angin lang mah se 2021 aiin 2022-ah puak thei thil puah hun chhung a rei lo a, kum hmasa aiin khapna kenkawhah hmasawnna a awm tih police hotuten an sawi.
The Zozam Times zawhna chhangin Deputy Inspector General of Police (Northern Range) Lalbiakthanga Khiangte chuan kum 2021 aiin 2022 kum thar lawmnaah halpuah leh halmawi lam chi hal hun chhung a tlem zawk tih sawiin, “2021-ah khan Aizawl chhungah chhum lo chat lovin minute 40 chhung puak thei thil a puak a, kuminah erawh minute 20 chauh hal ri hriat tur a awm,” a ti.
Lalbiakthanga Khiangte chuan minute 20 dawna halpuah leh halmawi lam chi hal hun chhung a tawi chu hmasawnna a nih thu sawiin, mi tam tak chuan sorkarin khapna thupek a chhuah chu hlawhchham der angin sawi mah se kum hmasa lam nen khaikhina a zatve dawna a tlahniam chu hmasawnna a nih thu a sawi a, khap hlawhtlinna kawng a kaw chho zel tih a sawi.
Sorkarin halpuah leh halmawi lam chi kawl leh hal khap a nih chungchangah veng tam tak khawtlang hruaituten an thlawp that thu sawiin, “Halpuah leh a kaihhnawih hal lohna veng hi a awm nual a, Kulikawn, Tlangnuam, Bethlehem Veng leh ?Chawlhmuhah te puak ri hriat tur a awm lo a, YMA an thawk tha hle a ni,” a ti.
Halpuah leh halmawi lam chi khapna hlawhtling turin tanrual a tulzia sawiin, “Police duty-te ringawt an tawk lo a, halpuah leh halmawi te, hetiang thil hi a tha lo tihna thinlung kan neih theih nan inzirtirna neih a tul,” a ti a, mipui tam zawkin sorkar khap thil hi an tih duh lo hunah khapna thupek hi a la hlawhtlin a rin thu a sawi bawk.
&&&&&&