Delhi Chief Minister Arvind Kejriwal chuan Thawhlehni khan Twitter-ah coronavirus a kai thu a puang a. Aam Aadmi Party (AAP) chief hi an chenna inah enkawl mek a ni.
“Covid-19 ka kai tih hmuh a ni a, natna lang chhuak nasa vak lo ka nei a. Kan inah ka inenkawl a. Tun hnaia ka bul hnaia awmte chu lo inngaichanga lo inendik turin ka ngen a ni,” tiin Kejriwal hian a tar lang.
AAP chief hi inthlang mai tur Uttarakhand leh Punjab-ah te an party tana campaign-a zin tum a ni a. AAP hian heng inthlanah hian beihpui thlak an tum.
Thawhtanni pawh khan AAP-in Parade Ground, Dehradun-a ‘Nav Parivartan Yatra’ an buatsaihah thu a sawi.
Nikum April khan Kejriwal-a nupui, Sunita chuan Covid-19 a lo kai tawh a, hemi tum hian chief minister pawh a inkhung hrang.
Delhi-ah hian Covid-19 a darh thar leh mek a, Omicron kai an tam hle.
Ram khawpui berah hian Omicron deuh vek an kai tawh a, genome sequencing tura sample thawn zinga 81% zetin an kai tih Health Minister Satyendar Jain chuan Thawhtanni khan state assembly-ah a sawi.
Delhi-ah hian darkar 24 liam ta chhung khan Covid-19 kai mi 4,099 awmin endik zinga 6.46% zetin an kai a. May 18 hnua kai leh endik zinga kai hmuh tam ber ni a ni.
Sample endik atanga kai hmuh zat (positivity rate) sang hi hriselna lama mi thiamte chuan an ngaihven ber pakhat a ni a, a san zel chuan inkhuahkhirhna pawh tihkhauh a tul thin a. Lieutenant Governor Anil Baijal chuan Thawhlehni khan District Disaster Management Authority (DDMA) chu a thutkhawmpui a, hetah hian chief minister leh mi thiam rualte pawh an tel.