Chhun leh zan hmalakna inrualkhai teh se
Zan curfew tihtawp a nih theih nan leh duh lo zawngin social media lamah boruak siam len a ni zel a, sorkar lam erawh chuan eng vakah an la ngaih loh hmel thung.
Zan curfew hi a tulna hmu lo tan chuan a holam viau ta ve ang. Khaw engah kan inhnawpchep tup tup a, kan inkhap hneh lo a, fimkhur tura inhrilhin awmzia a awm phah miau lo chungin, zan lamah khawng takin khapna thupek kan la inchhuah khum tluang zel a, pawn chhuaka inhnawhkhawm tup tup tham awm loh hunah kan han inkhap leh daih mai hi chu a kawnghmang lo ve bawk em a ni.
Kan fimkhur a, kan inkhap duh a nih chuan kan boruak milin insiamrem dan ngaihtuah ni mai se, mi tam tak lungawi lohna hi kan sutkiansak mai chuan a rinawm a ni. Thil hre zawkte sawi dan pheichuan, nei nung deuhten an tu leh fate an khap hneh miau si lo a, zan curfew zawngin tan an khawh, te an la ti ta deuh deuh! Dik maw, dik lo maw!?
Hetiang hi kan dinhmun ni deuh nuai mah se, hri leng a rawn hluar thar leh viau mai a, zan curfew hi a la tul deuh pawh a ni mai thei e. Mahse, kan fimkhur dawn a nih chuan chhun lam thlenga hma kan lak nat leh zual hi a tul khawp mai.
Khawlaia kan inhnawpchep dan leh hri leng lo ang maia kan khawsaziate hi siamrem a, her rem leh deuh chu a ngai leh tawhin a lang. Zan curfew a la ni zel dawn a nih pawhin chhun lama hri leng laka kan himna tura ruahmanna thar siam pawh a tul ve tho bawk awm e. Rorelna leh hmalakna hi han inrualkhai chho hram hram mawlh teh se.