Mizoram sorkarin Covid-19 leng laka mipui himna tura inkaihhruaina a siam thar dung zuiin nimin atangin Aizawlah dawr inhawn chhawk tan a ni a, sorkar thupekin zawm a hlawh tawk lo thung.
Mizoramah Covid-19 kai an pun chak leh deuh tak avangin sorkarin January thla puma hman tur inkaihhruaina a siam thar a, hemi dungzui hian Aizawl bawrhsapin dawr inhawn chhawk dan tur thupek a tichhuak a, nimin atang khan he thupek hi kalpui tan a ni.
Bawrhsapin ruahmanna a siam dan chuan nimin, Thawhtannia dawr khar turte chu thawmhnaw, pheikhawk dawr, second hand dawr, puan, puanthan leh la zawrhna, puan thuina leh a kaihhnawih dawr leh pangpar zawrhna dawrte a ni a; Aizawl khawpui chhungah hetiang dawr inhawng hi an awm nual.
The Zozam Times-in Aizawl khawpui chhung a fan kualnaa a hmuh china Aizawl New Market huam chhungah Thawhtannia khar tur dawr inhawng lui an awm mang lo a, Millennium Centre chhungah erawh thawmhnaw leh pheikhawk dawrte an inhawng vek thung.
Heng sumdawnna hmun lian pahnih bak veng thenkhatah pawh thawmhnaw dawr, puan thuina leh a kaihhnawih dawr, pangpar zawrhna dawr leh second hand dawr inhawngte hmuh tur a awm nual.
Aizawl New Market huam chhung bikah chuan mipui vei vak pawh an tlem hle a, Aizawl New Market office-a thawktute chuan sorkarin inkaihhruaina a siam tak avangin New Market chhungah mipui an tlem thu leh chawhmeh zuarte chauh an thut thu The Zozam Times an hrilh.
Sorkarin hri leng hluar zel tur dan chahna tura inkaihhruaina a siam angin Aizawl bak district danga bawrhsapte pawhin ruahmanna an siam a, hetihlai hian Aizawlah inkaihhruaina kalpui hi a khauh zual a ni.