INTACH Mizoram Chapter hruaitute chuan tun hnaia kang chhe ta, Aizawl Bawrhsap Pisapui chu a ngai ang chiaha sak that an duh thu Chief Minister Zoramthanga hnenah an thlen.
Nimin khan Chief Minister Zoramthanga chu INTACH Mizoram Chapter hruaituten a pisaah an kawm a. He hunah hian Aizawl Bawrhsap Pisapui kang ta chu pawi an tih thu sawiin, a ngai ang chiaha sak that leh ngei nise tiin an duh thu an thlen a. Chief minister pawhin a cabinet member-puite lo sawiho pui a tum thu a lo hrilh a ni.
The Zozam Times zawhna chhangin INTACH Mizoram Chapter Co-Convener Rinsanga chuan December 20, 2021 khan an pawlin Aizawl Bawrhsap Pisapui chu a kan chhiat hmaa a awm dan ngai ang chiaha din thar leh tura an lo rel tawh bawhzuiin, nimin khan chief minister hi an sawipui tih a sawi.
“Building thar sak kan duh lo a, a ngai ang chiaha din that leh kha kan duh ber a ni a. Kan duh ber chu heritage restoration hi a ni,” a ti.
“Kum 1972 thleng khan Aizawl Bawrhsap Pisapui atang hian Mizoram pum hi tute pawhin an awp a. Kum 1890 atanga kum 1972 chhung khan seat of administration a ni a. Chuvangin, a hlu a, a aia hlu hi a awm thei tawhin kan ring lo. Chuvangin, a ngai chiaha din thar leh hi a phu a ni,” Rinsanga hian a ti.
Rinsanga chuan Aizawl Bawrhsap Pisapui kang chhe ta hi a thar anga sak tumna a awm a nih chuan, a theih angin INTACH-in an do tlat zel tur thu a sawi a. “Hetiang tluka heritage building humhalh tlak a awm lo a. A ngai ang chiaha restore a nih theih nan kan nawr zel ang,” a ti bawk.
Aizawl Bawrhsap Pisapui hi tum hnih lai thiah tumna a lo awm tawh nia sawiin, “Mizoram UT hlim khan thiah veka secretariat building lian tak sak tumna a lo awm tawh. Mahse, khatih laia DC khan thiah a nih lohna turin hma a la a. Hemi hnuah, tum khat dang chu thiah tumna a lo awm tawh bawk a. Secretariat building sak tumin DC office bulah lungphum phum a lo ni tawh bawk. INTACH chuan hei hi a do tlat a, lungphum phumte pawh hluihlawn a lo ni ta a ni,” tiin Rinsanga chuan The Zozam Times a hrilh.
Kum 131-a upa, Aizawl Bawrhsap Pisapui hi December 17, 2021 zing dar 3:15 vel khan a kang a. A kan chhan chhui tura din magisterial inquiry chuan an chhui zo thawkhat tawh nia hriat a ni.