Zoram People’s Movement (ZPM) Working President K Sapdanga chuan ZPM chu puithiam rual uap party awmchhun an nih thu leh Val Upa Council an nei chu mipui rin an kai chhan lai tak a nih thu a sawi.
Kum 2022 chhung atana ZPM party office hawnna leh mi thar lawm luhna hun, an party office conference hall-a neihah nimin khan kum thar thu chah sawiin ZPM Working President K Sapdanga chuan kum 2023 MLA inthlanpui lo awm tur hi political party-te ai mahin neutral mipuiten an nghahhlelh thu leh, an vei zawk mah emaw tih mai tur a nih thu a sawi a. “Hetiang boruak a awm hi chuan sorkar a inthlak nge nge thin,” a ti.
K Sapdanga hian, ram rorelna tuak danah Pathian hriatpui tlak a nih a tul thu a sawi a. “Thinlung hretu Pathian mit hmuhah politics kan khel tih i theihnghilh lo ang u. Puithiam rual uap party awmchhun kan nih hi,” a ti a; unit atanga ram rorelna assembly house thlengin, Pathian hriatpui tlak politics chu politics Kalphung Thar a nih thu a sawi.
ZPM chu eptu party lian ber ni mah se, sorkar chet chhiatna au chhuahpui taimak viau ai chuan Kalphung Thar au chhuahpui uar a, tun atanga kalphung thar lantir hi mipuite beisei dan an nih thu a sawi a. “Val Upa Council kan nei a, mipui rin kan kai chhan lian tak an ni. Keimahni hlang ringawt chu mipui rin kai zo tawh lo vek kan ni. Kan khingpuite min beihna point lian ber pawh kan Val Upate thu ngai pawimawh tawk lova min puhna hi a ni,” K Sapdanga hian a ti.
ZPM working president hian politics khelh dan bawlhhlawh dodalin theihtawp an chhuah tur thu a sawi a. Hemi avanga hnehna an chan loh phah a nih pawhin beidawng mai tur an nih loh thu leh, a aia nasaa an beih zui zel tur thu a sawi bawk.
ZPM Office hawn inkhawm hi ZPM Leader Lalduhoma, MLA-in a kaihruai a. C Laltanpuia, Treasurer chuan ZPM zawm tharte lawmluhna hun a hmang a ni.