India ram chhinchhiahna pakhat tling, Delhi-a India Gate-a ram tana nun hlantu sipaite hriat reng nana meichher thi thei lo dah, Amar Jawan Jyoti flame an tih chu Zirtawpni khan sawnin National War Memorial siam thara meichher dang zingah dah ve a ni ta.
Sorkar laipui chuan he thil hi ‘India tan chhinchhiah tlak leh hun pawimawh’ tiin a sawi a. He mi puala inkhawm tawi tê neihah Amar Jawan Jyoti flame hi lak sawn niin India Gate sir lehlam, a awmna hmasa atanga NWM din thar meichher dangte kiangah dah a ni.
Meichher lak sawn inkhawm hi Integrated Defence Staff chief Air Marshal Balabadhra Radha Krishna pawhin a hmanpui a, ani hi meichher dahho rawttu hmasa zinga mi a ni.
Politics-a hruaitu lawk tak tak pawh an tel a, heng zingah hian Congress MP Rahul Gandhi pawh a tel a. Ani hi sorkar laipuiin Amar Jawan Jyoti flame tihluma National War Memorial-a a dang tihalh tur sawiseltu zinga mi a ni.
A hnuah sorkar hian chutiang a nih loh thu leh Amar Jawan Jyoti flame chu tihthih lailawka National War Memorial-a a dangte nena a huhova dah tur a nih thu a sawi leh a ni.
Sorkarin thuchhuah a siamah chuan India Gate-a dah Amar Jawan Jyoti-a meichher hi kum 1971 leh hun danga indonaa sipai thinte hriat rengna leh zahna a ni a, an hming erawh tar lan a ni lo.
India Gate complex chhungah National War Memorial hi Narendra Modi sorkar chuan siamin kum 2019 hawn a ni a. Indian sipai, Pakistan nena 1947-48 indova thi atanga Galwan valley-a Chinese sipaite nena inphek sualnaa thite hming zawng zawng tar lan a ni a. Firfiak beihnaa nunna chânte hming pawh a bangah ziah lan a ni bawk.
India Gate memorial ve thung hi British sorkarin a din a ni ve thung a. Kum 1914 leh 1921 inkara British Indian Army sipai thite hriat rengna atana tih a ni.
Amar Jawan Jyoti bik hi kum 1970 chho vel din kha niin India leh Pakistan indonaa thite puala dah a ni.