Uttar Pradesh assembly inthlan turah Congress chuan an candidate-ah hmeichhia 40% an awm dawn tih an puan hnu lawkah Zirtawpni khan thalaite tana an manifesto an puang a, hna nei lote tan hna siamsak an tum.
Thalaite tana manifesto an siamah hian naupang zawkte tihphura an vote lak nan leh chi leh sakhuana thil dah thaa anmahni lam an awn theihna tur an thlir tih a lang a. He state-ah hian kum 30 chuang sorkarna an chang tawh lo.
Manifesto tlangzarhnaah Congress general secretary i/c Uttar Pradesh Priyanka Gandhi Vadra chuan an state-a an party-in chief minister tura an ti nia ngaih theih turin thu a sawi.
Rorel lai, BJP tih loh chu sorkar siam turin an thawhpui thei vek tih a sawi a. “Eng thil pawh lo thleng sela, mi dang nen kan ti a nih pawhin kan manifesto hi a laipui berah a awm ang,” a ti.
Congress chief hlui, Rahul Gandhi pawhin sorkar laipui sawiselin India chuan hmathlir thar a neih a ngai tih a sawi.
“Hmathlir thar chhawp i duh a nih chuan Uttar Pradesh atanga i tan a ngai,” a ti a. Uttar Pradesh-a roreltute beiin thalaite chu kum 25 liam ta chhungin theihnghilh an ni a, engmah an chang lo niin a sawi.
Congress-in hna nei lo pek an tumnaah hian sorkar hna maktaduai 1.2 siam belh bakah mi mal enkawl hmunah mi 8,00,000 chhawr belh an tum a. Tual chhuak thiam thil vawrh lar an tum bawk.
Gandhi-i chuan an manifesto chu thu mai ni lovin an tih dan tur a nih thu a sawi a. “Zawhna awm ta chu engtin nge hna kan siam ang tih a ni a. Uttar Pradesh-ah hian ni 24 dan zelah mi 880-in hna an chân ang a ni a. Kum nga liam ta khan thalai maktaduai 1.6-in an hna an chân a. Thalaite hian hmathlir thar an mamawh a, Congress chauh hi chumi pe thei party chu a ni,” a ti.
Hna nei lote pe tura harsatna awmte an su kiang dawn tih sawiin, “Sorkarin hna lak exam a buatsaiha dik lo awmte kan titawp ang,” a ti a. Primaty school-ah zirturtu hna 1,50,000 leh a sang zawkah 8,000 a ruak tih a sawi bawk.