Mizoram Larsap Hari Babu Kambhampati chuan nimin khan Raj Bhavan-ah power & electricity department hotute a kawm a, power siam chhuah leh intodelhna kawnga sorkar hmalaknate a sawipui.
P&E hotute chuan P&E hnathawh tlangpui, power mamawh dan leh intodelhna kawnga hmalakna kalpui mek chungchang te, ni zung chakna ringa kawlpetha siam chhuah – electric current pangngai pek chhuahna hruia thlun zawm, consumer-te pawh theih tura P&E-in a chhawp chhuah chungchang te, kawlpetha chungchanga Mizoram dinhmun te larsap hi Powerpoint hmangin an hrilh fiah a ni.
Larsap chuan P&E hotuten kawlpetha chungchanga Mizoram dinhmun an tar lan atangin Mizoram mipui tam zawkin Grid Connected Solar Rooftop hmanga electric current pawh hlawkzia leh a that zawkzia te, a tirah sum senso tam zawk mah se a hnuah nasa takin electric current thlabi bill a tlem phah zawk a ni tihte an la hre chiang lo nia a lan thu a sawi.
Mipui mamawh bik department thenkhat ang bawkin power department pawhin mipui zirtirna uar zawka a kalpui a ngaih thu larsap chuan sawiin, “Tuna a lan dan chuan department tam takin central anga hamthatna tam tak awm mek hi beneficiary-te an thlen thin loa, hei hi tan lak ngaina lai a ni,” a ti.
Larsap chuan Mizoramin kawlpetha a mamawh zat, 171 MW ang hi chu tui luang chakna hmang leh nizung chakna hmangin harsa lo takin Mizoram chhungah a siam theih tih a chiang a, Solar Power Plant eng emaw zat leh small hydel project te hman theih tura hawn a ni tur chu a lawmawmin Mizoram hmabak a êng hle tih a sawi bawk a ni.