- Zirsangkima
Naupan lai TV
Khatia television neite’n antenna an herh fuh hlauh chánga Bangla’ a man zawk zawk theih laia ‘The Fall Guy,’ ‘Mc Guyver’ te, Pathianni tûka ‘He-Man’ te kan en fuh theih hlauh lai kha, hmân ni lawk emaw kan tia, a lo rei leh ta hle mai. Naupanghoin mi inah TV en kan díl a; an kawngka bulah silipar phelhin, ‘vawih lo’ tùrin thû kan han tiam hmasa leh tê tê a. Chumi hnua TV en phalna min pêk hlauh chuan chhuatah TV enin kan \hu khat ve dal \hin a nih kha.
A hnu lawk, 1992 chhoah Star TV a rawn thleng ta hlawl mai! Tape recorder-a an cassette kan hmuh phâk ang ang kan lo ngaithlâk ve \hin te khân, kan hma tak mai TV hmai-ah min rawn zai khum ta mai a! Ropui tih loh rual chi a ni lo. An hmél hmu chunga an zai … mai pawh ni lo, che thei lehzêla an zai kan han en pah thei zet kha chu le; TV-a sâp zai en loh kha meidîl tlâkna pawh ni dáwn ta se, sâp zai en kha kan \hulh duhin ka ring chuang lo!
Pathianni tlaiah MTV Asia Top 20 Video Countdown a rawn chhuak a. Nonie-i’n zei mangkhêngin a rawn puang lehnghâl \hin a. Tlangvál tam tak, rimawi ngaina êm êm hran loho kha chuan, sâp zai chhuak loin, Nonie khân puang reng mai se an duh hial \hin zâwkin ka ring \hin. TV neitutena Nonie-i thoin MTV Most Wanted program a puang an han en thei bîk \hin te kha kan va’n awt \hin tak.
Meat Loaf-a Zùn
Chûng lai vêl, Guns N Roses-ho ‘November Rain’ làr hnu deuhah, ‘November Rain’ ang thoa music video sei, ‘I’d Do Anything For Love (But I Won’t Do That)’ tih, Meat Loaf-a sak, a music video hmuhnawm zet mai a rawn lâr a. Meat Loaf-a zai thiam tia kan seprawtui nasat \hinzia leh a zaipuinu, tunge a ni tih kan hriat hauh si loh zai thiam kan tihzia leh aw ropui kan tih \hinzia te, chu zawng aia hmel \ha … pawh ti satliah loa sexy kan tih nasat \hinzia te kha aw…
Mahse, kha music video kha, keini, tléma la naupang deuh, Middle sikul rap \an vêl chauh tán kha chuan a râpawm deuh mah mah a. Dawihzep ta rêng rêng chu, a hlau páwlah ka \ang leh a. |hiante hmuh hlau zet chungin, mai mitchhíng duh chiah bîk lo, meng dere chungin kan han en ta \hin a. Zai thiam ka ti a, a hla mawi ka ti si; han en loh ngawt kha ka ngam lo, pawh ni loin, ka phal lo \hin.
Meat Loaf-a Cassette Káwm En Thu
|um khat chu engti tihin emaw ka U Marina, sâp cassette thar a neih theih êm avâng leh kan vénga tape deck nei \ha ber a nih avànga kan ngaihsân rawn office báng chuan Meat Loaf-a cassette (album) ‘Bat Out of Hell II: Back into Hell’ kha a rawn hàwn tlat mai a. Kan \hianzaho zíngah min hrilh hmasa ber! Ka va han intithei tak!
Zànah \hiante hruaiin a inah a cassette ngaithla tùrin kan léng nghâl. Mahse, current a rawn thim. A cassette káwm khawng, Magnasound tih inziak kalha a poster (album jacket) chu kan inthlìr chhâwk a. Bike-a mi pakhat, mei alh a\anga rawn zuang thlà ni àwm tak leh in sáng tak chunga bâk lian tak ding lai milem chu kan en ngawih ngawih ringawt mai a. Current lah chuan awm tànge a ti duh hlek si lo. Kan hàw hun thleng chuan U Marina cassette thar, Meat Loaf-a cassette káwm chu kan inen chhâwk tlawk tlawk ta mai a! Kan lungawi ve êm êm tho!
A tûkah sikul kal kan ngai si. Tin, ani paw’n office a kai dáwn bawk. Zànah kan léng leh. Current a aw—Yesss! Kan ngaithla ta … Kan ngaithla nawn leh \hin. ‘I’d Do Anything For Love…’ chu, tape neitupa chuan a rewind nawn zing malh malh e… Manhla hi kan va’n ti vawng vawng tak!
Tûn hnua ka ngaihtuah lêt leh cháng hian khatih hun laia kan hmuh ve chhun sâp zai thiam cassette hlutzia kha hre thiam hian ka inhre ve \hin. Kan hmuh theih chhun kha a hlu êm êm mai a. An hla hit pawh, a thiam pawh kan thiam (kan thiam ang ang khân! An sak dàn leh kan sak dàn chu a inang vek kher lo ang!). Vawiina, hetia YouTube leh Spotify hmang tea duh duh zai kan han ngaithla cher cher thei ta te hian, rimawia ril\àmna a ti bo deuh sawt em aw … te ka ti fo mai.
A MV Kha
A music video (MV) mawlh mai kha, tûn hnu hian ka en nawn lehin ka han bèl chiang thar leh a. Director kha, Hollywood movie director ropui, ‘Bad Boys sequel’ te, ‘Pearl Habour’ te, ‘Armageddon’ te, ‘Transformer’ te leh film hit tam tak direct tawhtu, Michael Bay-a direct a lo ni reng mai tih te ka’n hre chhuak a. Tin, hmeichhe rawn zai ve, thiam kan tih êm êm mai pawh kha, a MV-a a model hman ni loin Lorraine Crosby a lo ni tih te; a model hman, zai anga lang kha, film star chhe lo Dana Patrick a lo ni tih te ka hre chhuak lehzel bawk a. A zai ve tak tak emaw titu kha keini chauh kan lo ni bîk miah hleinêm! Recording industry liante paw’n Crosby-i zai phun remtu Dana Patrick-i kha Meat Loaf-a zaipuitu emaw tiin hla record tùrin an lo sàwm luai luai ve tho hi a lo ni a…
July 1993-ah Los Angeles County-ah an chang a. Ni li chhúng zet hun an hmang. A MV thawnthu kha French novelist, Gabrielle-Suzanne Barbot de Villeneuve-a fairytale ‘Beauty and the Beast’ leh French author, Gaston Leroux-a ‘The Phantom of the Opera’ thawnthu zúla siam a ni. Dana Patrick kha ‘Beauty’ anga tàr lan (portrayed) niin Meat Loaf kha ‘The Beast’ anga pho lan a ni thung. Dárkár hnih chuang Meat Loaf-a hmél kha an chei \hin a; a râpthlâk rêng a ni. An sum sèn (budget) pawh a sáng vai vai hle. Khatih laia movie hlawhtling, ‘Four Weddings and a Funeral’ siam nána an sum sèn zât, US dollar mtd. 4.4 vêl an séng hem mai a lo ni.
A hla, single-a tih chhuah a nih khan ram 28-ah No. 1 dinhmun a hauh thei nghâl a. US-ah phei chuan kár nga chhúng ngawt mai No. 1 dinhmun a hauh thei a, copy mtd. 1.4 hralh chhuah a ni bawk. UK-ah pawh The Beatles-ho hla hit, ‘Hey Jude’ hnua No. 1 ni rei thei ber record thar a rawn siam bawk a ni.
Meat Loaf, Mang \ha le…
Zirtàwpniah Marvin Lee Aday, Meat Loaf tia hriat làr chu kum 74 mi niin a thi tih ka hria a. A chanchin ka’n bih chiang nghâl a; rimawi tualah mai ni lo lemchan tuala a hlawhtlinna te a ropui hle mai. Sawi vekna hmun leh hun erawh niin ka hre chiah lo a. Amah Meat Loaf ka hriat ve dàn hmanga thlahna thu sawi ve mai ka ni.
Kum 74 chhúng a mikhualna rama a rawn chàm ve chhúng khân a taksa lamah harsatna a nei ve reng mai a. Kum 2003-a London-a Wembley Arena-a concert lai a tlûk hnu lawkah a lung zai a ni a. Hemi hnu hian mipui hmaah a inlan tawh meuh lo. A hnu 2007-ah, Wembley-a a concert kha a concert hnuhnung ber tùr a nih mai theih tawh thu a sawi nghe nghe a ni. A thih chhan hi tàr lan a ni lo thung a; a nupui Deborah leh a fanute pahnih Pearl leh Amanda te chu a thih hian a bulah an awm tih zawng an ziak hlawm.
Tûn hnai lawk khân Meat Loaf hian Covid-19 avànga inkhuahkhirhna chungcháng a lo sawisêl tawh a. Nikum August thla khan, The Pittsburgh Post-Gazette hnênah, ‘Ka thih dáwn chuan ka thi mai ang. Tu tih luihna hnuaiah mah fam ka chang dáwn chuang lo,’ tiin a lo hrilh tawh a ni.
Aw ropui neitu, a hla mawi tak avànga a zai ka ngainat, Meat Loaf hi, ‘Meat Loaf, mang \ha le,’ tiin zah takin ka’n thlah ve ang e.