India chuan a vawi khat nan ama siam chhuah ralthuam, BrahMos missile chu a thawn chhuak ve dawn ta a. Zirtawpni khan Philippines Defence Ministry leh BrahMos Aerospace Pvt Ltd (BAPL) chuan missile eng emaw zat inleisakna tur, US $ maktaduai 374 hun inremna an ziak tih sipai thuneitute chuan an sawi.
BrahMos Aerospace hi India-Russia thawhhona a ni a. Tuihnuailawng, lawng pangngai, thlawhna leh khawmual atanga supersonic cruise missile BrahMos siam chhuaktu an ni.
US $ maktaduai 374 hu inremna (contract) an ziah hi vaukam hnaih atanga Philippines Navy-ten hmelma lawngte BrahMos missile hmanga an lo kahna tur inhlanchhawnna tur a nih thu sipai hotute chuan an sawi.
Defence ministry-in thuchhuah a siamah, “BAPL (BrahMos Aerospace) leh Philippines ram national defence department chuan January 28, 2022 khan inremna ziakin tuipui kama anti-ship missile system tihchangtlunna tur an inpe dawn a ni,” a ti.
BAPL hi ram pahnih, India leh Russia inthawh tawmna company niin Defence Research & Development Organisation hnuaia awm a ni a. “Contract ziah a ni hi India sorkarin invenhimna hmanruate ram pawn lama thawh chhuah a kalpui mek atan hmasawnna rahbi pawimawh tak a ni,” tiin defence ministry chuan a tar lang.
India hian a BrahMos missile hi a chhuang hle a, China nena inrina, Line of Actual Control hrula Ladakh leh Arunachal Pradesh-ah pawh a chhawp nual a ni.
Inremna hi Philippines national defense department hmunpui, Quezon City-ah ziah niin Philippine Defence Secretary Delfin Lorenzana pawhin inremna ziah hi a hmanpui.
January 14 khan Lorenzana-a hian ram dang atanga ralthuam an chawk luh tur hi a lo sawi tawh a, India-in Philippine Navy-in hmelma lawng a lo beihna tur leitir tuma ruahmanna a awm thu a sawi a ni.
India leh Philippines-in missile inleisak tura inremna an siam hi China tan thu ngaimawhawm tak a ni thei dawna ngaih a ni a. South China Sea-ah Philippines nen an inkar a tha lo thar leh mek a. Philippine Marines hian an BrahMos chu vaukam atanga hmelma lawng lo beih nana chhawp an tum a, South China Sea hi an chhawpna tur hmun pakhat ni ngei tura ngaih a ni.
Inremna siam tak hian ralthuam inhlan chhawn piah lama kalpui tam tak a nei a. Battery pathum inpek tel a ni ang a, ralthuam enkawl leh buaipuitu tur zirtirna pek leh integrated logistics support (ILS) package pawh a tel ang.
Lorenzana chuan Philippine Marines-a Coastal Defense Regiment chu an sipaite zinga tun lai thiamna hmanga thuam ralthuam hmang rim bertu tur an nih thu a sawi.
BrahMos hralh chhuah tur hi India-in ralthuam a hralh chhuahna kawnga huang zauhna tur pawimawh tak a ni dawn a. A hmain thlawhna lam thil, vaukam thlithlaina hmanrua, radar hmanrua, sipaiin a inven nana a mi mala a hman thin leh vaukama patrol-na lawnglengte a lo hralh chhuak tawh thin.
Philippines nena inremna an siam tak avang hian ram dangte hnenah pawh BrahMos hralhna kawng a inhawn beisei a ni bawk a. Km 290-a thui kap thei leh ralthuam kg 200 phur thei missile hi Asia chhimchhak ram dang – Vietnam leh Indonesia ramte pawhin an duh ngei rin a ni a. Heng ramte nena indawrna hi lo kalpui fo tawh thin a ni.
India leh Philippines ramten BrahMos an inleisakna tur kalkawng hi a thui viau a, kum 2017 atang daih tawha hma lakna kal a ni a. Philippines president pisa chuan an ram sipaiten kum 2020-a ‘Horizon 2 Priority Projects’ an kalpui zinga telh turin a pawmpui a ni.
India chanchinbu thenkhat chuan December, 2019 khan Philippines ram hi ram pawn atanga BrahMos missile system lei hmasa bertu an nih dawn thu an lo tar lang tawh hlawm a. Kum 2021 kum tir lama President Rodrigo Duterte-a’n India a tlawh tum khan inremna pawh ziah mai a beiseiawm thu tar lang mah se Covid-19 hripui leng avangin engmah kalpui hleih theih a ni lo.
Tuna an leina tur hi Lorenzana chuan December 31, 2021 khan a hming ziah hnanin $ maktaduai 374.962 man zet tur a ni a. Thla hmasa khan Philippines sorkar hian an ram invenhimna hmanruate tihchangtlunna turin peso tluklehdingawn 2.8 ($ maktaduai 55.5) a lo pawmpui tawh a ni.
Philippine Navy team chuan December thla khan BrahMos Aerospace-in Hyderabad-a missile an siam chhuahna hmunpui chu an tlawh zui a, hei hi inremna ziah tur thlithlaia kal an ni.