MNF President Zoramthanga’n sorkar flagship programme, SEDP ball an roll tawh dawn nia sawiin, Mizoramah chhungkaw 50,000 atanga 60,000 tuam tura kalpui an tum thu leh a dawng tur thlan hmasak zingah MNF ni lo political party dangte chu an tel a rin loh thu a sawi.
He thu hi nimina Diakkawn YMA Hall-a MNF Diamond Jubilee lawmna a hmanpuinaah a sawi a. “Pathianin rem a tih chuan SEDP ball kan roll tawh dawn a. Kan tum dan chuan Mizoramah chhungkaw 50,000-60,000 tuam vek kan tum a. Kolasib bialah hian chhungkaw 1,000-2,000 inkar thlan tur lo ngaihtuah rawh u,” a ti.
Chief Minister Zoramthanga hian sorkar kum thar atangin SEDP sem an tumah hian Covid-19 leng avangin vawi khatah sum tampui an pek theih dawn loh thu sawiin, “Chhungkaw pakhat tan cheng sing li/nga te chu kan thei ngei turah kan ngai,” a ti bawk.
Kolasib-ah hian chhungkaw 1,000 atanga 2,000 inkar tan, SEDP dawng turin mahni duhzawng trade thlan mai tur a nih thu sawiin, “A thenin lo vah te, thlai hmun siam te, vaimim leh bekang chin te, kuhva leh mau te, sangha dil lam pawh a ni ang. A then chuan kut thiamna te, vawk leh ar vulh te pawh a ni ang. ‘Kei chuan eichawp dawrin bul tan ka tum’ pawh in ti mai thei; pheikhawk dawr siam, lu mehna dawr te pawh in ti mai thei. Thingtlangah eizawnna chi hrang hrang puihna tur pawh in thiam chi in thlan tur a ni a. In eizawnna trade puihna atan a sing telin kan pe dawn che u a ni,” tiin MNF president hian a sawi.
MNF president hian MNF Unit-ten SEDP dawng thei tur chhungkaw thlan tur lo en tura tiin, “Han en ula, in vengah khan, in thlan loh tura ka rin chu Congress member te, ZPM member te, party dangte chu tunah a hmasaah chuan in thlan ka ring hauh lo. Sorkar hnathawk leh hausa thlan ngai lo chi pawh an awm ang,” tiin, heng zawng zawng an thlitfim hnuah chuan chhungkaw 1,000 atanga 2000 inkar thlan chu a fai deuh puk a rin thu a sawi bawk.
Trade hrang hrang hnuaiah SEDP te an sem chhuah hunah chuan, kum 2023 inthlanah pawh MNF party lo chu sorkar tur chuang an awm rih loh thu leh mipui rin hlawh ber a la nih thu Zoramthanga hian a sawi a. Tun dinhmunah Comngress leh ZPM te lian deuh niin lang mah se, Congress chu an tluk chhiat vek tawh avangin er tham awm lo ang an nih thu a sawi a. ZPM pawh inhampuar thiam tak, MNF ni lo Congress ni lo movement tia insawi, unit chu kohhran tia MLA (ind) pasarih tihtlin an nih thu leh, tunah erawh an nihna lang tanin, mipuiin an hmu thiam tan niin a sawi a. ZPM chu Val Upa Council, Working president leh leader an neih dante chu tui anga nghet lo an nih thu a sawi a ni.