NFL player ropui Tom Brady a chawl ta
American football inelna lian National Football League chanchin a player ropui ber a mi tam takin an chhal, quarterback Tom Brady chuan Thawhlehni zan khan inkhelh a chawlhsan thu a puang.
Kar liamta atang tawh khan Brady hma hun hian sawi zui a hlawh tawh a, NFL lama chanchinbumi rintlakten a chawl dawn nia an sawi hnuah amah Brady ngeiin a hma hun tur a tichiang a. Season 22 a khelh hnuah kum 44 mi hi a duhtawk tawh dawn.
Tampa Bay Buccaneers tana khel Brady hian NFL a championship, Super Bowl chu vawi sarih a chawi tawh a, hei hi league chanchin a player pakhat in a chawi hnem ber a ni. A team hmasa zawk New England Patriots tan season 20 a khelh chhungin vawi ruk a champion a, Tampa Bay a season hnih a cham chhungin vawikhat champion in tun season-ah NFL Playoffs divisional round a hruai thleng.
Super Bowl a Most Valuable Player chawimawina vawi nga dawng thei Brady hian Buccaneers hnenah hian kum khat contract la nei mahse chawlh a thlang zawk a. A thutlukna chu hlawhtling tura inpekna sang zawk neih ngai chu a tlin tawh loh vanga siam a nih thu a sawi.
NFL regular season a Most Valuable Player vawi thum ni tawh Brady inkhel hnuhnung ber hi January 24 khan niin Los Angeles Rams lakah 30-27 in an tlawm a. He inkhelah hian 27-3 a an hniam zawk tawh hnuah 27-27 ni turin a team a ‘comeback’ pui a, a tawp dawnah erawh Rams an tling ta zawk.
Social media kaltlangin Brady chuan, “Kan infiamna hi kan engkim hlan ngaihna a ni tih hi ka rilru puthmang a ni a, kan engkim tak tak kan hlan loh chuan a hlawhtlin theih loh.”
“Ka inkhelhna zinkawng hi ka tan thil nuam leh hlimawm a tling a, ka beisei phak bak niin hun harsa lai leh hun hlimawm tak takte a awm. Nitin a hetiang hun hman chuan tawp lam hi kan ngaihtuah ngai lo.”
“Tunah hetia ka han thlirlet takah chuan player leh coach ropui tak tak ka thawhpuite leh ka hmachhawn thinte, kan inelna boruak sang tak takte kha ka vanneihna a ni tih ka hria a, khang boruakte kha kan zavaia kan duhthusam thin ang kha a ni.”
“Heng piah lama thian tha ka siamte, inkungkaihna thuk tak tak kan siam takte hi ka ngaihlu zual a, hengte hi ka hriat reng tawh tur an ni. Khawvela mi vannei ber ka ni hian ka inhria.” tiin a chawlh thu a puang.
Mi ropui thlahtute an theuneu lo
Brady-a’n a chawlh thu a puan rualin a team hlui pahnihten an thlah ve nghal a. Buccaneers in, “Damchhunga hriatreng tawh tur min hnutchhiah. Kan lawm e.” an ti a, New England Patriots in, “Zinkawng ropui a ni. Kan lawm a, kan lawmpui a che Tom Brady.” an ti ve thung.
Anni chauh hi khawvel infiammi zinga ropui ber ni a tam takin an ngaih thlahtu an ni lova. A inkhelhpuite leh American football mi leh sa chauhin an thlah lo. Infiamna huang hrang hrang a mi hlawhtlingte leh milarten Brady an chawimawi a, America infiamna chauh ni lovin European football a star larte pawh telin England captain Harry Kane leh Belgium goalkeeper Thibaut Courtois te thlengin thlahtu zingah an tel.
Hollywood milar chauh ni lo khawvela sumdawnna leh huang hrang hrang a mi langsarte thlengin an tel bawk a. NFL commissioner Roger Goodell chuan Brady chu NFL a khel tawh player ropui ber ti a hriatreng a nih tawh tur thu a sawi.
Patriots chairman leh CEO Robert Kraft chuan, “Tom Brady laka ka rilru hi thu a sawifiah theih a ni lo. Ka chhungte, New England Patriots leh kan fans te nen a chunga kan lawmzia hi phochhuah sen a ni lo.” a ti ve bawk.
TB12 – thawnthu ngaihnawm leh ropui
Kum 1977 August ni 3 a piang Thomas Edward Patrick Jr. hi a professional career tawp dan ropui mahse a bul tan dan nena thlir chuan ngaihnawm leh mak a tling. An khaw team San Francisco 49ers quarterback ropui Joe Montana ngaisangtu hian high school-ah football, basketball leh baseball a khel vek, kal zel a thlanna football-ah ber hian theihna nghet tak a nei tih belchiangtuten hmu mahse dahsan erawh a hlawh ngai lo.
High school atang tawhin hlawhtlinna a chan theih nan midang zawng aia a sual chhuah zel a ngai a, college football khel turin sawmtu engemaw zah a neih zingah University of Michigan a thlang. Kum 1995 khan an college football team Wolverines a quarterback indawt danah pasarihna a ni pha hram. Kum 1998 ah chauh starting quarterback niin 1999 season-ah nen a team a chetthatpui nghal thung a, college football inelna hmawr bawkna Citrus Bowl leh Orange Bowl ah te a team a chakpui chungin NFL a luh dawnin team te mit a la chuang lo.
NFL Draft-ah team ten college player tha te an team a tel turin an thlang thin, Brady pawh hi round hmasa ber beisei ngam lo mahse round thumna vela thlan a inbeisei laiin round 6-naah, 199-naah thlan a ni chauh a. Amah aiin quarterback dang paruk thlan hmasak an ni a, New England Patriots chuan player tangkai a la nih theih ringin chher inbeisei chungin enchhinna atan a tawp lamah an thlang.
Mahse Foxborough ah erawh a taihmakna, a tlawm duh lohna, finna leh quarterback position a khel tura thluak a neih that a lang nghal thuai. A season hmasa berah Pro Bowler (an All-Star ve) vawi li ni thei Drew Bledsoe thachhangdawltu berah a inhlangkai thei a, a season hnihnaah Bledsoe chu an vawi hnih inkhelhnaah a inhliam a, Brady hian thlakin Bledsoe hian a nekchhuak zo leh tawh lo. Patriots chu Super Bowl hruai thlengin Brady-a’n a team a chakpui nghal.
New England ah coach ropui Bill Belichick leh Brady te ‘combi’ tluka kum 20 chhunga league thunun hneh hi NFL chanchinah sawi tur a tam lo. Defensive coach Belichick hi NFL coach ropui ber zing ami a ni a, pa thu duh leh khauh tak, a mawi nazawng aia result tha an neihna tura thil tih mai duh thin a ni. Brady-a’n a coach tur tak hnuaiah professional zinkawng a zawh a, quarterback dangte anga tlanchak, che rang, ban tha chak leh ball vawm na ni lo mahse a thluak a hmang thiam tlat a, a pu thluak leh a thluak inmil tlat chu NFL chanchin a team hlawhtling ber Pittsburgh Steelers an tlukna tura Patriots chakna a ni.
Patriots “system” avangin Brady hlawhtlinna fak chiam hreh an awm thin, mahse kum 2020 khan New England a chhuahsan a, beisei pha ngai lo team Tampa Bay a zawm. A kum khatnaah Brady a hlawhtling nghal hian mi bik a nihna a lantir chiang. Thahrui ngah leh field chhungah mit la tak ni tura khel nalh ni lo mahse a pawimawh ber – hnehna chang tura tih ngai ti zak zak thei turin finna a nei a, thil thleng tur hmu lawk thiam thin in chuta tang chuan a theihna kawl angte hmangin a tih tur a ti mai a, an chak leh nge nge thin.
Chawhrual a kum thum leh a chanve vel chauh player-ten an daihna thin tia sawi infiamna hautakah Brady-a’n kum 22 a khelh theih chhan hi amah an fakna a ni leh a. Kum 44-ah pawh a vanglai ang chiaha la khel tur hian khelmual pawn lama a inbuatsaihna in fak a hlawh thin. A ei leh in a uluk a, TB12 Method tia an tihlar tak hmangin taksa inenkawlna a kalpui. Ice-cream pawh avocado atanga siam chauh a ei! Gym-ah inbuatsaihna a neihin thahrui ngah ringawt a tum lo. “Six pack” neih aiin “pliability” a ngai pawimawh a, a upat telh telh ruala a ball vawm na telh telh leh dik telh telh chhan niin mi tam takin an ngai.
Inkhel tura a inbuatsaihna a ngai pawimawh a, a namai lo bawk. Khingpuite zirchiang peih mi, mahni team thlenga zirchiang peih a ni a, 2021 Super Bowl an khelh dawn kar khan uluk zawk a ‘game film’ en a inbuatsaih a duh avangin a nupui supermodel Gisele Bundchen leh a fate chu chawlh hmangin a zin chhuah tir daih.
A hnuhma tam tak zingah Super Bowl vawi 10 a khelh zinga kum 2017 a 28-3 a an hniam zawk hnua Atlanta Falcons laka an ‘comeback’ in hmahruaitu ropui a nihna a tilang a. Kum 2007 khan New England Patriots chanchina awmchhun ni turin regular season-ah an inkhelh apiangin a chakpui vek. NFL a team hlawhtling berte ai pawh a Super Bowl a chawi hnem zawk hian a ropui tih a nemnghet. A elpui hlun, Messi leh Ronaldo te boruak tluk zeta inelna boruak lian a neihpui Peyton Manning-a’n, “Tha ber ni tura a inpekna, tumruhna leh inthunun tlatna hi ka thiana ka ngaihsan chhan ber hi a ni.” tia a thlah hian a Tom Brady professional zinkawng hi a hril kim hle.
Brady chanchin tawi thenkhat :
- Kum 1995 khan Major League Baseball team Montreal Expos in an team a khel turin an thlang a, ‘catcher’ tha berte zing ami a ni thei dawn a ngaiin contract lian tak pek an tum laiin football khel tura sawmtu college an awm nual avangin football khelh a thlang.
- Team pawimawizia hrechiangtu a ni a, khelmual chhunga an khingpui defense laka amah vengtu a ‘offensive line’ a khelte hnenah thilpek a pe ziah. Kum 2007-08 season phei kha chuan Audi Q7 a pe vek. Sumdawnna lian ten an fakna thenkhat a lang tura amah an sawmin a offensive line te a telh tir thin bawk.
- Salary cap khauh taka hmanna league-ah an team a player dangten contract tha zawk an neih ve theih nan leh player tha dang an lakluh theih nan hlawh tlem zawka contract ziah a ching. Kum 2017 khan kum khata Dollar maktaduai 20 hlawh turin contract a ziak a, NFL quarterback zinga hlawh hnem ber 12-na a ni pha chauh. Kum 2013 khan QB hlawh hnem lamah 20-na a ni bawk.