Mizoramah Covid-19 leng a hluar zel a, Thawhlehni khan hri kai mi 2,573 hmuh a ni a; hri len hnua ni khat thil thua hri kai hmuh chhuah tam ber tum a ni.
Sample 9,223 endik atanga hri kai hmuh chhuah hi za zela 23.75 a ni a, hri kai zinga mi 1,325-in symptom an nei a, mi 1,248 erawhin an nei lo thung.
Hri kai hmuh chhuah 2,573 zinga 1,569 (60.97%) chu Aizawl district chhung atanga hmuh a ni a. Hri kai 1,569 zinga 885 chu Rapid Antigen Test hmanga hmuh niin, mi 663 chu ZMC-a RT-PCR hmanga hmuh a ni a, Truenat Laboratory atanga hmuh mi pahnih leh FIA atanga hmuh 19-te an ni.
Aizawl dawta hri kai hmuh chhuah tamna chu Mamit district niin, hri kai hi 254 an ni a; a pathumna Lunglei district-ah hri kai 218 an awm.
Hri kai thar an pun chho zel avangin hri kai enkawlna hmunte pawh a khat hneh viau a, hri kai enkawlna hmunpui, Zoram Medical College-ah pawh khum ruak a awm hman meuh lo va, nimin tlai dar 5 thleng khan hri kai enkawl mek mi 13,420 an awm a ni.
Nimin thleng khan Mizoramah Covid-19 kai mi 177,595 an awm a, tlai dar 5 thlenga sorkarin a chhinchhiah china Covid-19 kaihhnawiha nunna chân chu mi 615 an tling tawh.