Manipur-a assembly inthlan lo awm tura Congress hova tangrual, Manipur Progressive Secular Alliance (MPSA) chuan Inrinni khan common agenda an tlangzarh.
Party partuk – Congress, Communist Party of India (CPI), Communist Party of India (Marxist), Forward Bloc, Revolutionary Socialist Party (RSP) leh Janata Dal (Secular) te hian MPSA siamin an manifesto intawm chu an tlangzarh.
An sorkara tihhlawhtlin an tum zingah Isak-Muivah-a kaihhruai, National Socialist Council of Nagalim (NSCN-IM)-in Manipur leh an thenawm, Assam leh Arnachal Pradesh-a Naga-te awmna chu state khat ni tura an karna chu na taka do an tum thu an tar lang.
Tihhlawhtlin an tum 18 zingah thalai hna nei lote hnena allowance pek te, Indian Constitution-a Article 371 (c) (special provision with respect to the development of the mountainous areas of Manipur) tihhlawhtlin, tui in tur thianghlim siam, power supply khaihlak awm lo leh ruihhlo do te pawh a tel.
Common agenda an tlangzarhnaah hian Congress Parliamentary Committee Chairman leh Manipur Election Observer Jairam Ramesh pawh a tel a. Chief minister vawi thum lo ni tawh, Okram Ibobi Singh chuan MPSA-in assembly inthlanah hnehna an chang a nih chuan an common agenda chu lehkhaah leh a takin an tihlawhtling dawn tih a sawi a, langtlang sorkar an ni dawn tih a sawi.
Congress hruaitu hian tlang tina mite duh tihhlawhtlin a nih tur thu a sawi bawk.