Nikum November 25 zana Delhi-a Assam chief minister leh Mizoram chief minister-te zanriah kilhonaa tel ve, Abu Majumdar chu zanriah kilhonaah hian Assam team a tel a nih loh thu leh Mizoram chief minister team-a mi a nih thu Secretary to CM, Assam Jyanta Malla Barua-a’n a sawi niin BJP, Mizoram Pradesh-in thuchhuah siamin an tar lang.
BJP, Mizoram Pradesh chuan tun hnaia sawi hlawh tak, Delhi-a Assam leh Mizoram chief minister-te zanriah kilhonaa dan lova kuhva tawlha inhnamhnawiha rin, Majumdar a tel ve chungchangah nimin khan Assam chief minister office an biakpawh thu leh Secretary to CM Malla Barua-a’n zanriah kilhonaah hian Majumder chu Mizoram CM team-a tel a nih thu a lo hrilh niin an sawi a. Majumdar-a chu dan lova kuhva tawlh thua Assam sorkarin man tura a zawn mek a nih thu a lo hrilh niin an sawi bawk.
“Kuhva smuggler Abu Majumdar hi Assam VIP team zinga mi ni se Assam sorkar hian man a tum lo ang a, ani pawh a tlan chhiat/bihruk a ngai lovang tih hi kan ngaihdan a ni,” BJP chuan an ti a. Hei hian Mizoram sorkar chu dan lova kuhva tawlh ruknaah a inhnawmhnawih ngei a ni tih a tichianga an hriat thu leh thu dik tak Mizo mipuite hrilh thin tura hriattir thu an sawi.
Mizoram leh Assam ramri chungchanga Vairengtea inkahna thlen hnua state pahnih chief minister-te inbiakna hmasa ber, November 25, 2021 zana zanriah an kilhonaah hian Assam-a Barak Bullettin chuan Mizoram chief minister tawiawmtu zingah dan lova kuhva tawlha inhnamhnawih, Majumder a tel niin an ziak a. Hemi chungchangah hian Mizoram CMO chuan February 7 khan thuchhuah siamin, “Abu Majumdar chu Assam lam rawn hruai a nih a rinawm,” tia tar lan a ni a. Hemi ni vek hian MNF party pawhin thuchhuah siamin Majumber chu Assam CM hruai niin an tar lang bawk a. BJP Mizoram Pradesh chuan Mizo mipuiten thudik an hriat theih nan hma an la ta niin an sawi bawk a ni.