- PL Liandinga
Mihring kan changkan leh changkan loh tehna pakhat chu kan huat zawng te, kan lawm zawng te atangin a teh theih ang. Khaw thenkhatah chuan mi ang lo tihdan zir hi nuihza ropui berah an ngai a, khaw thenkhat chuan lehkhathiam leh mi taima te an chawimawi thin. Khaw tam tak chuan eng hi nge an khaw tan thil pawi ni a, eng hi nge an khawtlang hmasawnna tur an ngaihtuah lo ni hialin a lang.
Tunhnaia Mizoram Pradesh Congress Committee ten Darlawn tlangdung sikul sawmpanga an tlawhnaah chuan thil fel lo tak mai an hmuh thu, January ni 25, 2022 khan an puang chhuak a. A tuartu ber tur chu he tlangdung, Darlawn tlangdung hi an ni a. Hetia han ngaihtuah mai chuan he tlangdung a mi pangngai chin tan chuan an tlangdung khaw hrang hrang a thil thleng hi thinrimthlak tak a ni thei. Congress lamin an sawi emaw sawi lo emaw, ZPM an inrawlh emaw rawlh lo emaw, a nih lohdan turin pawisa awm reng chung siin an khaw naupangte luhna tur sikul an sa a, chu chu ngaihtuah tur a ni mai.
Kan hriat reng tur chu sorkar pawisa hmanga hnathawktute hian an duh ang angin thil an ti ngawt thei lova, a thawktu hi an thu ber hauh lova, a ruahmantu leh a thuneituten thawk tura an tih anga thawk mai tur an ni tih hi kan chian a ngai a. Chu thlirna atanga han thlir chuan Darlawn tlangdunga khaw hrang hrang mipuite hian eng angin nge he thil hi an ngaih ang a, engtinnge an tih dawn tih hi ngaihtuah tur a ni.
Helai tlangdung a khaw lian ber leh bengvar ber tur Darlawn High School II sak thatna tur chu cheng nuai 17.92 ngawt mai a’n kim lo sa ringawt a. He pawisa kim lo zat hi sikul dang pakhat sak puitlinna tham a ni. Hetiang pawisa a kim loh tawh hnu pawh a thinrim nachang hre lo khua chu a zah pawh an zahawm lova, mahni tana pawi tur leh pawi lo tur pawh thliar hrang thiam lo ang hial an ni thei ang. A hna thawktu tur MNF Worker tan pawh a tlawm thlak lutuk reng reng a. Hetia sawi set set lova cheng nuai sawmpasarih zet mai inchhuh nghal ngawt mai hi chu thil kawngkal lo tak a ni.
Helai tlangdung hi thil mak thlenna hmun a ni ve reng reng nge ni tun tuma MPCC Media Cell te sikul en hian Sailutar an hmaih tlat mai a. Hmanni lawkah Sailutar kha khati khawp khan Mizoramah a lar a, tun tuma sikul sakna pawisa hi an dawng ve lo nge, MPCC lam hian thlarau thianghlim chenchilh khua a nih vangin an en ve ta lo tih lah kan hre lova, Sailutar hi a lang ve hauh lova, MNF sorkar hian Sailutar hi pawisa a pe ve lo em ni ang tih te ngaihtuah rum rum theih a ni. Heng hi chu zeldin thubawl, awlsam taka finfiah mai theih a nih laiin hmanni lawka Sailutar khua a lar em avangin kan han hawl kual mai mai a ni.
Helai, Darlawn tlangdungah hian sikul sakna tur pawisa hi a satu tur te kutah cheng nuai 57.23 a thleng lo ringawt ni ngeiin MPCC lam sawidan chuan a lang a. Thil awmdan pangngai han ngaihtuah chuan he pawisa awm lo hi chu a taka thawktute tih dik loh engmah a awm lova, sorkar lam thuneitute atanga kim lo ni awm takin a lang. A hna hmututen an hna hmuh man an pawtthla te pawh niin a lang thei a. Kan awmdan hi a langsar ve vaw hle mai.
Mak tak mai chu heng hna hrang hrang, khaw hrang hranga thawktute hi han ngaihtuahin MNF mi leh sa an ni turah a ngaih theih a. Neutral mi an nih loh rau rau chuan Congress mi leh sa te, ZPM mi leh sa te chu an ni lovin a rin theih. Keiin a mak ka tih viau mai chu a pawisa hi a kim lo a kim lo hian an hnathawh tur tha taka thawh theihna tawk tur niin ka hria a. A hnathawh tur hi an sawi dik a nih chuan an pawisa hmuh hian tha taka hnathawhna chu a la daih thovin ka hria.
Darlawn piah hmar lama khaw lian leh lar ber, Sakawrdai Middle School II te ang te pawh sikul pindan pahnih siam turah pakhat chauh an han siam a, a pindanna bang leina an ui ni maw. A sikul dung leh vang zau zawng a engti zawng mahin a’n tling lo ngawt a. Ceiling atan lah khaw lum leh vawt vawng thei, Fibre Glass Wool hman tura tih a nih laiin Silpauline an han hmang tlat a. A inthlau lulai deuh zawng a ni. A estimate lama cheng nuai li vel man tura an chhut laiin Silpauline pali vel, cheng singkhat pawh tling mang lo hmangin an han siam a. A thawktu hi ‘Keini chu Pathian leh kan ram tan,’ titu pawl a mi a ni si a. An khaw sikul naupangte chu a hmangaih awm lo hlein a lang (Tunge a nih pawh hre hawt lovin ka’n ti ta vak mai chu a nia!). Chutah a hna hmutu pawh ‘Pathian leh kan ram tan,’ titu pawl mite duhsak zawng mi a ni leh a. A enkawltu kan hriat lar ber pawh ‘Pathian leh kan ram tan,’ titu Minister a ni leh zel a. A khawilai tak hi nge ‘Pathian leh kan ram tan,’ kan tih hriatthiam a har khawp mai.
New Vervek Middle School te pawh pindan pali siam turah pindan pahnih chauh an han siam pek a. Ceiling atan lah sikul dang an tih angin khaw lum leh vawt vawng thei, Resin bonded fibre glass wool hman tur an han ti kher a. A estimate lamah chuan sorkar pawisa hi kan ren lo hlein a lang. Thingtlang sikul-ah pawh hetiang hi dah vek tur an ti ni ngeiin a lang a, mahse Darlawn tlangdungah chuan pakhatah mah an dah lo vek a, he ceiling hi thil awm tak tak lo a ni ang a, a estimate siamtu hian a siam ve mai mai em maw ni dawn ni tih palh awl tak a ni. New Vervek-ah pawh hian chutiang saptawng kawi thui deuh ceiling chu hmang lovin plywood bawk an hmang.
Vaitin High School hi a sa tha ber pawl an ni mai awm mang e tih theih turin MPCC te hian he sikul chiah hi a zau zawng tur dik angin an ziak a. Mahse anni pawh hi ceiling ropui tak hmang ta lo chuan silpouline-ah an tla thla a. Darlawn tlangdungah chuan ennawm chhuah ila, ‘Kan mi chak khan rangva pawt thler lovin lehkha a rawn pawtthler zawk dawn,’ ti ila thinrim tur an awm lovin a lang. An ceiling hman tura sawi leh an hman tak hi a inthlau veng veng em mai.
Mak ka tih fo thin chu thingtlang mi, Party politics a inhmangten zahna nei hauh lova hna chhe tak tak mai an han thawk tlat thin hi a ni a. An Party mitmei pawh an veng lova, an Party lo mitmei pawh an veng hek lova, thenawm khawvengte mitmei pawh an veng hek lo. Pathian lam lam te hi chu a sawia sawi buai pawh a ngai lo. Hlawkna uchuak umin mak tak takin thil hi an ti mai zel a. Heng thil hi finna leh zahawmna nen chuan englai pawhin a inpersan hla reng a, kan retheihna hi tisa thil mai a ni lo, rilru atangin kan rethei ngawih ngawih a lo nia, han changkang mai ziazang pawh kan ni lo.
Mihring changkan lohna hmun apiangah zah theih lohna a sang a, sorkar pawisa bo thlau a tam zual thin. Heng avang hian politics hi mi tam tak tan chuan a tenawm reng mai a. Mahni khaw sikul, hlep nei lo pawh ni si lo, hlep tam uchuak duh vanga hetia kan sa duh hi a mak hle mai a. Darlawn tlangdung khaw hrang hrang te pawh hi mahni chanvo leh thiamchanna chin pawh humhalh nachang hre lo an nih chuan an ngawi reng ang a, mi pangngai chenna khua an nih erawh chuan he thil dik lo tak mai hi a tul angin an hmachhawn ngei tura ngaih a ni. An tu leh fate kalna tur sikul, a nih lohdan tur baksak a, saksaktute hi an tan zahder a tulna a awm lem love.