Mizoramah lirthei a pung zel a, a bikin Aizawlah a pung nasa zual a. Hemi avang hian hri leng avanga inkharkhip kalpui a nih hnu pawhin hri leng hma pha thuak Aizawl Traffic Police-in lirthei dan bawhchhia an man.
Aizawl City Traffic Police hotuten The Zozam Times an hrilh danin, Covid-19 len hma, nun phung a pangngai lai, 2019-ah lirthei dan bawhchhia 13,125 man a ni a, hri len hnu thla tam tak chhung inkharkhip kalpui a nih kum, 2020-ah dan bawhchhia 11,253 man an ni a; hri len hma leh hri len hnu inthlauhna hi 1,872 chauh a ni.
The Zozam Times zawhna chhangin Traffic Police hotuten lirthei a pun nasat em avangin lirthei dan bawhchhia man tur pawh a pung lo thei lo tih an sawi.
Traffic Police chhinchhiah danin kum 2017 atanga 2021, kum nga chhungin lirthei dan bawhchhia 67,120 an man a, dan bawhchhiate sum chawi tling khawm chu Rs 2,65,17,100 a tling.
Kum nga chhunga dan bawhchhia an man tam ber kum chu 2018 kha niin, lirthei 16,049 manin, an sum chawi tlingkhawm chu Rs 5,765,050 a ni a; dan bawhchhia an man tlem ber kum chu 2020 kha niin lithei 11,253 an man a; sum chawi tlingkhawm chu Rs 4,878,550 a ni.
Kum kalta, 2021 khan Traffic Police hian Aizawl chhungah lirthei dan bawhchhia 12,824 an man a, an sum chawi tling khawm chu Rs 4,727,400 a ni.
A kum hmasa, 2020 aiin dan bawhchhia man hi 1,571-in an tam zawk a, hetihlai hian sum chawi tlingkhawm erawh a tam zawk thung a. Kum 2021 aia 2020-a sum chawi a tam zawkna chu Rs 1,51,150 a ni thung.