Brazil-a khawpui pakhat, Petrópolis-a ruah sur nasa avanga lei min leh khawpui chhunga tui lian thut avangin mi 100 dawn an thi niin thuneituten an sawi.
Rio de Janeiro hmar lam tlangrama khawpui hi tun hnaia ruah sur tam takin a nuai a ni.
Tlang panga in sakte chu lei min avangin a chhe nasa hle a, lirtheite pawh khawpui chhunga tui lianin a len nasa hle bawk.
Chirh karah chhanchhuah hna thawktuten dam chhuak an zawng mek zel.
Brazil-a National Civil Defence chuan damin mi 24 an chhan chhuak tih Twitter-ah an tar lang a, mi 94 thi an awm tih an finfiah tawh bawk a. Social media-a video thehdarhah chuan thil chhiate pho lan niin khawlaiah lirtheite chu tuiin a la nasa hle tih a hmuh theih.
“Indona ang mai a ni a, car-te chu banah a inkhai a, a thal a, chirh leh tui a la tam em em bawk,” tiin Rio de Janeiro Governor Claudio Castro chuan thuthar lakhawmtute a hrilh.
Mi 35 chin hriat lohvin an la awm mek a, zawn leh chhan chhuah hna chu chawl lovin an thawk mek tih a sawi.
Petrópolis hi Rio de Janeiro hmar lam tlanga khualzinten an tlawh nasat tak hmun niin nipui lai phei chuan kum zabi 19-na hun laia sak monarch tlawh turin miin an pan nasa thin hle.
Ruah an dawn hi thla khata sur zat vel zel darkar thum chhungin a sur a, hei hian lei timin tuihawk leh tui lian chuan in leh dawr eng emaw zat a tichhia a ni.
A tuar na ber vengah phei chuan hmun khatah lei minin in 80 zet a tichhia a ni.
“Tui a khauhvin a chak em em a, ka inhloh vek a ni. Hripui avanga kan khawsak a buai em em laiin hetiang chhiatna hi a lo thleng zui leh si,” tiin dawr neitu pakhat, Henrique Pereira chuan Reuters news agency a hrilh.
Kum 24 mi, Wendel Pio Lourenco-i pawhin, “Tawm hulna zawnga biak in ka panna kawngah hmeichhe naupang chirhin a lo delh, la dam si ka hmu a ni,” tiin AFP news agency a hrilh a. “Mi tinin indona hmun ang maiin kan ngai hlawm a ni,” a ti bawk.