Congress party President Lalsawta ‘President Tour’ chu nimin khan Diakkawn, Kolasib-ah hawn a ni.
He hunah hian thu sawiin Congress Treasurer Zodintluanga Ralte, MLA chuan Mizoramah party lian pathum a awm mek thu tute nge tha ang tih mipuiin an thlir mek sawiin, “MNF party chu sawi tam a ngai lo, mipuiin an hnawl mek a. ZPM party hian chief minister atana an hual chu an party president atan pawha an duh loh a ni, party kaihhruai tur atan pawha an duh loh hi Zoram kaihhruai turin a tlak dawn em ni?” a ti.
Zodintluanga Ralte hian MNF chu an ropui ber laiin Mizoram mipuiin tawrhna nasa tak a thleng thin tih sawiin, tun tumah pawh MNF kum thum sorkar chhung lekin harsatna chi tinreng a awm tih a sawi a. “Kan chief minister ngeiin Zo buh ngat a sawite chu vawiinah chuan, Supply Minister a mangang a, Mizoramah buh kan thar tlem thu a aupui a ni. A nuar thei zawng zawng an nuar a ni leh ta ringawt a, he sorkar hian a ram mipuite chawikanna hi a ngaihtuah ve lo a ni,” a ti bawk.
“Congress party hi Pu Lal Thanhawla’n hun rei tak min kaihhruai a, hmasawnna tam tak kan nei a. Tunah amah anga mi tha leh mi dik Pu Lalsawta kan nei leh ta a. Pu Lalsawta hian min arkhawthim daipui ve mai mai dawn lo,” tiin, kum 2023-ah sorkar leh turin Congress party an inpuahchah mek thu Congress Legislature Party (CLP) Leader hian a sawi.