Scientist-te chuan Covid-19 avanga inkharkhip avanga emission tihchhuah thin tlem thut chuan kum 2020 chhunga China-a ruah sur nasa a thlen phah niin an sawi.
Greenhouse gas leh boruak nawi, aerosol an tih mai chhuak tlem thut chuan boruak inthlak nasa tak leh ruah sur tam zawk a thlen phah nia ngaih a ni.
Nipui laia ruah sur nasa avangin in mi sang tel thiin mi maktaduai chuang hmun hima suan chhuah ngaiin an awm a. Emission chhuak tlem hi a nih reng theih erawh a rinawm loh thung.
China khawchhak lamah khan nikum June leh July khan ruah sur nasa avanga tui lian an tuar nasa hle a. Heti tak maia nipui laia ruah a sur nasat chhan hmun thuma thena hmun khat hi chu inkharkhip nghawng niin an sawi.
Nikum kha Yangtze luipuiin kum 1961 hnu lama ruah a dawn tam ber kum a ni a, kum 41 liam ta chhunga June leh July thlaa ruah a dawn thin chawhrual aiin 79% zetin nikum khan a dawng tam.
Heti taka ruah a sur chhan hi Indian Ocean-a boruak inthlak nasa vang niin a sawi bawk.
Tunah hian international team pakhat chuan theory thar buaipuiin Covid-19 len hun laia inkharkhip avanga greenhouse gas leh aerosol tihchhuah a tlem thut kha ruah sur tam chhan pakhat ni ngeiin an ngai.
An zirnaa an hmuh ziaktute chuan kum 40 liam ta chhung khan China laili leh khawchhak lamah boruaka aerosol tam telh telh avangin ruah a tla tlem hret hret niin an sawi.
Heng aerosol an tihte hi lungalhthei kang atanga insiam a ni ber a, boruaka a tam chuan thlipui leh ruah thawk tur a titlem thin a ni.