California-a kum 12 zet bo tawh ui pakhat chu a neitute nen an inhmu leh nawlh mai!
Zoey an tih ui hi Stockton bula vantlang bawlhhlawh paihna hmuna bawlhhlawh paih motor-in a bun tel chu mi pakhatin hmuin police a hrilh a. A chhar lai hian a chak lovin a bawrchhawr hle tih a sawi.
Animal services officer chuan a taksaa microchip an dah chu scan-in kum 2010 atanga bo tawh ui ngei a ni tih a hre thei a ni.
“Hetiang hi a thleng thei ang tih ka suangtuah phak ngai lo va, ka lawmin ka phur tak zet a ni,” tiin a neitu, Michelle-i chuan a sawi.
Zoey-i hi a bo rei tawh em avangin microchip company pawhin kum 2015 atang kha chuan thi tawhah a dah tih San Joaquin County Sheriff’s Office chuan a sawi.
Zoey endik (scan)-tu, officer Brandon Levin chuan a neitu biakpawhna kimchang chu chip firm atangin a la chhuak a, a neitu pawh hian mobile number ngai a lo hman hlauh bawk avangin an inbe thei ta a. “Ka’n hrilh chuan mak pawh a ti hle a ni,” a ti.
Ui hi a bo tanna, Lafayette atanga mel 60 vela hlaah daih chhar a ni.
Michelle chuan, “A pianpui pahnihte nen thla ruk an nih laiin kan la a, thla ruk chuang kan awmho hman. Dawrah minute 20 vel kan kalsan chhungin a lo bo daih a ni,” a ti.
“Hlim taka kan inhmuh leh ka beisei a, a hrisel thata a dam chhung kan awmho tawh ka beisei,” a ti bawk.