Gas company pahnih – MD Assam Gas company ltd. (AGCL) leh Indradhanush Gas Grid ltd. (IGGL) hotu lu ten nimin tlai khan Chief minister Zoramthanga hmuin, Mizorama hmalak dan tur chungchang an sawipui.
IGGL hotute chuan Mizorama national gas grid a luh na tura an hmalak dan te Chief minister chu an hrilh a. Cadstral survey an buaipui mek tihchakna tura sorkar puihna an mamawh thu leh nakin zela Aizawl leh a chhehvela pipe-a eirawngbawlna gas consumer te pek theihna tura City based gas network din chungchangte an sawipui.
AGCL hotute pawhin Meiduma gas awm lakchhuaha hman tangkaina tur kawnga an tangkai theih dan te leh hemi kawnga Mizoram sorkar an puih thei dante chief minister chu hrilhin, Mizoram sorkar chu thawhpui an duh thu an hrilh a. Meiduma gas awm zat azira kawlpetha siamna atana hman tangkai theih dan te, eirawngbalna gas pipe-a consumer te pek theih dan te leh CNG a hman tangkai theih dan te chief minister chu hrilhin an sawipui bawk.
Chief minister Zoramthanga chuan Mizoram chu gas based economy-ah zawi zawia a tahluh ve na tura ruahmanna siam hmasak a tul thu sawiin, Mizoram hmasawnna tura AGCL IGGL te nena thawhdunna neih chu tha nia a hriat thu a sawi.
Sorkar thuchhuahin a tarlan danin, IGGL hi sorkar laipuiin hmarchhak state khawpui zawng zawngte gas pipeline-a thlunzawm hna a pe a, he hna hi Guwahati, Silchar leh Tripura-ah te an tan chho mek a. Mizoramah chuan Tripuraa Panisagar atanga gas pipeline lutin Mamit district paltlangin Aizawl thleng tura ruahman a ni. IGGL chuan Mizoramah chuan kumin June thlaah hna tan hman an inbeisei.
AGCL MD Gokul Swargiyari leh IGGL CEO Ajit Thakur te hi Rajya Sabha MP K. Vanlalvena sawmna chhanga Mizorama tlawh an nih thu leh Chief minister an hmuhnaah pawh Rajya Sabha MP chu a tel thu sorkar thuchhuah chuan a tarlang bawk.