Mizoram Synod puipa ten nimin khan Mizoram larsap Hari Babu Kambhampati chu Raj Bhavan-ah hmuin, mipui vantlang tana hmalakna tangkai tur leh tunlai Mizorama thil thleng pawimawhte an sawipui.
Synod hruaite chuan Mizoram sorkar leh kohhran te Mizoram hmasawnna tura lungrual taka an thawhho thin thu hrilhin, Mizorama remna leh muanna a awm theihna atan te, zirna tihhmasawn, inthlanna thianghlim a awm theihna tur, mipui vantlang tana luanchhuah kawngah leh sorkar thlawp a tulna dangah te kohhran ten theihtawp an chhuah thin thu an hrilh.
Mizoram Synod-in mipui vantlang rawngbawlna kawnga Synod social front hmanga rawng an bawl dan te Larsap chu an hrilh a. Kristian ten India ram hmun thenkhata harsatna an tawh chungchang te, ICFAI chungchang, refugee chungchang, COVID19 chungchang, danlova bungraw tawlh chungchangte bakah Skill development chungchangte an sawipui bawk.
Larsap chuan Mizorama kohhran leh tlawmngai pawl hrang hrang ten mipui vantlang hmasawnna atana sorkar tha taka an thawhpui thin leh anmahni sensova state hmasawnna tura an luangchhuak thin chu state danga NGO leh sakhaw dang vuantute tan pawha entawntlak leh chhuanawm a nih thu a sawi.
Mizoram a awm chhung reiloteah mi hrang a kawm tawh thu leh hmun hrang hrang a tlawh tawh thu sawiin, Mizoram mipui tam zawkin central scheme tha tak tak miharsate chawikanna atana kalpui mek te an hriatloh bakah an dawng lo tih a hmuh thu Synod hruaitute chu a lo hrilh a. Central welfare scheme tam tak te chu Mizo mipui ten dil nachang an hriatloh chhan chu zirtirna that tawk loh avanga an hmelhriatloh vang a nih thu sawiin, hemi kawnga mipui zirtir kawngah kohhran hruaitute chu a mi rin berte zinga mi an nih thu leh he awareness campaign pawimawh tak atan hian kohhran a penchhuah chuan hmasawnna a awm ngei a rin thu Synod hruaitute chu a lo hrilh bawk.