Ranchi-a Central Bureau of Investigation (CBI) special court chuan Thawhtanni khan Rashtriya Janata Dal (RJD) hruaitu, Lalu Prasad Yadav chu ran chaw leina Rs. Vaibelchhe 139 zet tichingpena puhna thubuaia thiam loh a lo chan tawhnaah kum nga lung in tang tur leh Rs. Nuai 60 chawi turin a hrem.
RJD supremo hi February 15 khan thubuaiah hian thiam loh chantir a lo ni tawh a, Thawhtanni khan hremna hi puan a ni.
Yadav-a hi Doranda treasury atangin dan lovin Rs. Vaibelchhe 139.35 la chhuaka puhnaah CBI court hian thiam loh a chantir a ni.
Kum 73 mi, politician hlun tak hi a hriselna pawh a tha tawh lo va, Rajendra Institute of Medical Sciences (RIMS), Ranchi-ah kar hmasaa thiam loh chantir a niha an tantirna, Hotwar lung in atangin lak a ni tawh.
Ran chaw leina thubuai dang, Jharkhand-a Dumka, Deoghar leh Chaibasa treasury atanga sum tam tak dan lova la chhuaka puhnaah pawh thiam loh chantir lo ni tawhin kum 14 zet tang tura hrem a ni sa.
Yadav-a dan hre mi chuan Thawhtannia a hremna an puannaah hian videoconference hmangin court-ah a inlan tih a sawi a. Kar kal ta Thawhlehnia thubuai thutlukna an puannaah erawh amah ngei a inlan thung.
Doranda treasury scam case-ah hian mi 170 zet inhnamhnawiha puh an ni a, mi 55 erawh thubuai ngaihtuah a nih chhungin an thi tawh a. Mi paruk chu an la tlan bo mek a, pahnihin an puhna hi an pawm a. Yadav-a telin, Mi dang 99-te chu CBI court chuan thiam loh a chantir a ni.