Khawzawl – Ngaizawl PMGSY road black topping/white topping hna, kum 2017 atanga tan tawh chu tun thlenga zawh a la nih loh avanga leh hna a chak zawkna tur daltu an awm nia hriain mipuiin hnathawktute camp chu nimin khan an thiat.
Ngaizawl VC leh All NGO Coordination Committee-in hemi chungchangah hian thuchhuah siamin, he kawng siam hna hi first class contractor Collin Lalsangpuii hminga Lalrinliana Sailo-in a chhan a nih thu leh Romuanpuii Zadengin a thawh thu an tar lang.
Kum 2017-a tan tawh ni mah se, kum li leh thla thumah pawh km 4 chauh thawh a la nih thu sawiin, kumin March-a zawh tura tih chu September thleng pawh seisak ni mah se, a zo hman dawn lo tih a chiang niin an sawi.
He kawng siam muang lutuk avang hian kumin January 29 khan YMA Sub-Hqrs, group, branch leh PWD-in ruahmanna siama February 15, 2022 ral hmaa white topping thawk tura mi dang an biak rem tawh chu Romuanpuii Zadeng chuan luh a la phal loh avangin an lung a awi thei lo niin Ngaizawl VC leh NGO chuan an sawi a. “Ngaizawl khuain kawng tha kan neih lohna tura hmalatu chu Romuanpuii Zadeng hi a ni kan ti lo thei lo a ni,” an ti.
Ngaizawl VC leh NGO chuan Romuanpuii Zadeng chuan kum 2018-ah sum a neih loh avangin hetih laia JE remruatpuinain bill siamsak a ni a, bill a lak ve leh thawk nghal tura a intiamna pawhin awmzia a nei lo niin an sawi.
“A hna a chak theih nan tiin Ngaizawl ram khawi hmuna mi pawh, mi mal ram thlengin lung leh thing a tul apiang hmantir a ni a, a hna bahlah lova a thawh theih nan Hmaiphihkawn atanga Ramrikawn inkar kawnghlui pawh zawh theiha siam ni mah se, a hna a sawt phah chuang lo,” an ti.
Khawzawl – Ngaizawl kawng PMGSY road siam hna chu February 28, 2022 ral hma ngeia a hna neitu, contractor Collin Lalsangpuii ngei emaw, he hna thawk zo thei ngei tur mi dang emaw thawhtir an phut a. Romuanpuii Zadeng chu a hnathawktute leh a khawl leh hmarua zawng zawng nena helai hmun chhuahsan tur hian tiin, nimin chhun dar 12 thleng khan hun an pe a, an hun tiam chhunga a inlak chhuah loh avangin mipui an che ta nia thudawn a ni.